Մենք էդ տղերքին արգելել ենք մեր անունից խոսեն

Հարցազրույց ազատամարտիկ, լրագրող, սցենարիստ Սուրեն Սարգսյանի հետ

 -Դեռ գարնանից ազատամարտիկներն իրենց սոցիալական խնդիրները բարեփոխելու պահանջներ էին առաջ քաշում, իսկ հիմա, կարծես, այդ պահանջները մի քիչ քաղաքակա՞ն բնույթ են կրում:

- Ոչ թե մի քիչ, այլ ամբողջովին քաղաքական բնույթ է  կրում, եթե կուզեք իմանալ: Էն, որ ի սկզբանե նստացույցով բարձրացվել էր ազատամարտիկների սոցիալական կարգավիճակի հարցը, դաշտային հրամանատարներով հավաքվեցինք, նստեցինք-զրուցեցինք, էդ տղաներին պարզաբանեցինք, որ մենք նման խնդիր չենք կարող ունենալ, քանի որ բոլորի սոցիալական վիճակն է վատ, ամբողջ երկրի: Պետությունը, պետականությունը կանգնած է կործանման եզրին, դրա համար մենք պիտի էս իշխանություններից պահանջենք, որ աշխատեն մարդու պես, ամենեւին այլ խնդիր մենք չեք կարող ունենալ: Մենք առանձին սոցիալական խնդիր իրավունք չունենք լուծելու, մենք հիմա չենք կարող տատի կամ հիվանդի թոշակից կտրել տանք, կամ էլ թալանն ավելացնեն, որ մեզ հաց տան: Դրա համար էլ էս երկրի թալանչիների հարցը բարձրացրել ենք ասպարեզ. դա քաղաքական հարցապնդում է, այո, էս իշխանությունները կեղծ են, ընտրված չեն, եւ իրենց հնարավորություն ենք տալիս՝ կամ կաշխատեք մարդու պես, շատ կարճ ժամանակից կտեսնենք քայլերից, կամ էս իշխանությունները պիտի գնան:

- Փաստորեն, սոցիալական պահանջը փոխվեց քաղաքական պահանջի: Ո՞րն էր դրդապատճառը:

- Ի վերուստ մեր մի երեք ընկերն էին սկսել, որոնց իշխանությունն այսօր օգտագործում է՝ անընդհատ ռեպորտաժներ ցուցադրելով, թե տեսեք` կառավարությունը վերջապես շրջվեց դեպի ազատամարտիկները: Էդ լափը թող կառավարության անդամներն ուտեն՝ մեծից փոքր, մեզ ողորմություն պետք չի, մեր երկրին տեր է պետք, մեր երկիրը տեր չունի: Էս երկիրն արդեն մեռան հոշոտելով տարաբնույթ արարածները, ուրեմն մենք պիտի նախ մեր երկրի խնդիրը կարգավորենք, փոփոխություն է պետք, լուրջ ու սրտացավ մոտեցում, եւ մենք դա կանենք:

- Այդ երեք հոգին ասելով` ո՞ւմ նկատի ունեք:

- Մի քանի օր առաջ հեռուստացույցով ցույց են տալիս, որ գնդապետի աստիճանով մեր ընկերոջը, այո, ինքը՝ Վոլոդյան, ազատամարտիկ է, կռված տղա է, որ Վանաձորում ինչ-որ ակցիա էր անում, եւ, իբր աչքալուսանք, ասում են՝ այ, կառավարությունը շրջվեց եւ հեսա լուծելու է էս մարդկանց հարցը: Դա ընդամենը շեղելու ձեւ է բուն թեմայից, դա նաեւ հայ սպային ստորացնելու ձեւ է, ի՞նչ է նշանակում՝ գնդապետը գնացել է, ասում է՝ հացի հարց լուծենք: Հացի հարցը վաղուց պիտի լուծեին, որ չեն լուծել էս իշխանությունները, որովհետեւ իրենք զավթել են ամենը, ինչ որ ուներ էս ժողովուրդը, եւ մինչ օրս էլ լափում են ու հույս ունեն, որ կլափեն: Մենք թույլ չենք տալու, մենք համաժողովրդական համահավաք ենք անելու, մոբիլիզացիա, էսպես ասեմ:

- Փաստորեն դուք՝ դաշտային հրամանատարներդ, գնդապետից եւ սոցիալական խնդիրներ բարձրացնող մյուս ազատամարտիկներից առանձի՞ն եք գործում:

- Մենք էդ տղերքին արգելել ենք մեր անունից խոսեն: Մյուսներ չկան, կա 3-4 մարդ, ովքեր հովանավորվում են իշխանավորների կողմից եւ փորձում են բուն թեմայից շեղել մեզ բոլորիս: Մենք շրջում ենք շրջաններով, սահմանամերձ գյուղերով, հանդիպում ենք մեր հրամանատար ընկերներին, որեւէ մեկը նման խնդիր չի բարձրացնում, բոլորը պատրաստ են գալ Ազատության հրապարակ եւ այս ապիկար իշխանություններին ստիպել աշխատել ճիշտ: Կաշխատեն՝ կաշխատեն, չէ` ուրեմն մեծից փոքր գնալու են:

- Դուք ձեր հայտարարության մեջ նաեւ «թշնամի» բառն եք օգտագործել, նշել եք, որ այս ամենի թիկունքում դրսից ուղղորդվող կենտրոններն են, որոնք, օգտվելով Հայաստանի իշխանությունների թուլությունից, փորձում են իրականացնել արաբական երկրների սցենարը: Կբացե՞ք փակագծերը:

- Թշնամի ասելով՝ դրսի ուժերին նկատի ունենք, բայց այս երկրի իշխանավորները՝ Քոչարյան Ռոբերտ, Սերժ Սարգսյան, էդ երկուսը հատկապես, տարիներ շարունակ գողություն են արել, չեն ընտրվել նախագահ, գնացել են իրենց հավատարմությունը հայտնել մի դեպքում Արեւմուտքին, մյուս դեպքում` Արեւելքին եւ երկուսին էլ ասել՝ տղերք, մենք ձեր շունն ենք, մենակ թե մեզ պահեք, ձերն ենք, գողությունն արել ենք, ոչինչ, մենք ձեզ կծառայենք: Հիմա եկել է մի պահ, որ էս մարդիկ սրանց ասում են` դե, տղերք, որ մենք ձեզ պահեցինք, կողմնորոշվեք՝ կամ, կամ: Հիմա երկրում էս բոլոր քաղաքացիական ակտիվությունները գրանտ ստացող կազմակերպությունների միջոցով դրսից են ուղղորդվում, եւ տանելու է արնահեղության, ինչպես արաբական երկրներում, բայց մենք թույլ չենք տալու. սա ի գիտություն դրսի ուժերին: Իսկ մեր իշխանություններին ասում ենք՝ խելքի եկեք, կամ թույլ չեք տալիս, կամ էլ ռադներդ քաշեք, էս երկրում նոր իշխանություն ընտրենք, տեսնենք ինչ ենք անում:

- Փաստորեն, եթե մեր իշխանությունները համագործակցում են դրսի ուժերի հետ, նրա՞նք էլ են թշնամի:

- Եթե կշարունակեն իրենց էսպես ամորֆ պահել կամ ամեոբայի պես ողնաշարը հազար տեղ թեքելով՝ ոչինչ չտալով, եւ, բնականաբար, ավելի մեծ թշնամական վերաբերմունք չկա, քան գենդերային օրենքը բերել-մտցնել Ազգային ժողով: Ազատամարտիկներս որեւէ պաշտոնի հավակնություն չունենք, չենք էլ ունենալու, բայց էդ հրապարակը պիտի հավերժ թեժ պահենք բոլոր գալիք իշխանությունների համար:

- Կարելի՞ է ասել, որ վերջնագիր եք ներկայացնում իշխանություններին՝ կամ, կամ:

- Սա վերջնագիր չի, սա ընդամենը սթափության կոչ է, երբ գա վերջնագրի ժամկետը, դա էլ կներկայացնենք:

- Դուք դրսից մեզ ուղղորդող կենտրոնների մասին խոսեցիք, բաց կարծիք կա, որ հրամանատարներդ էլ ռուսական կողմից եք ուղղորդվում: Այդպե՞ս է:

- Ես չեմ զարմանա, եթե որոշ ժամանակ հետո ռուսական կողմն ասի, թե մենք եվրոպական կողմին ենք ծառայում: Չկա նման խնդիր, կա մեր երկրի շահերից բխող իրավիճակ: Մենք ասում ենք՝ կամ-կամը մեր պետության համար անընդունելի է, չկա այդպիսի կողմնորոշում, որ ազատամարտիկը Ռուսաստան կոմնորոշվի թե Եվրոպա, բայց եթե մենք կանգնենք կամ-կամի առաջ, ուրեմն պետք է ազգովի որոշենք: Ոչ մի Սերժ Սարգսյան, առավել եւս չընտրված, չի կարող որոշել կամ ստորագրել մի Ասոցացման համաձայնագիր: Սա ազգովի պետք է որոշենք հանրաքվեի միջոցով, բայց նման հարց չպիտի առաջանա: Մենք էստեղ ունենք ռուսական բազաներ, որն ինչ-որ իմաստով երաշխիք է, բայց դա չի նշանակում, թե ռուսներն ինչ ուզեն՝ էն էլ պիտի անեն: Մենք կամ ու կամ չունենք, մենք իրավունք ունենք ունենալու ընտրված իշխանություն, որը կլինի մեր Հայաստանի սկիզբը, մեր չարիքը գալիս է իշխանությունների գող, ավազակ, չընտրված լինելուց. էս խնդիրը պիտի լուծենք:

- Գուցե այդ խոսակցությունները նրանից են, որ Դուք վերջին տարիներին բնակվել եք Ռուսաստանում: Գուցե անգամ ռուսական հատուկ ծառայությունների կողմից եք ուղղորդվում:

- Ես իմ ստեղծագործական աշխատանքով եմ գնացել Ռուսաստան, սցենարիստ եմ եւ այնտեղ սցենարներ եմ գրել ֆիլմերի: Այլ հանդիպումներ ու խնդիրներ ես ռուսաստաններում չեմ ունեցել: Այո, հանդիպել եմ բոլորի հետ, այդ թվում Կառլոս Պետրոսյանի հետ (ԱԱԾ նախկին պետ) եւ այստեղից փախած նախկին պաշտոնյաների հետ, բաց դա ոչինչ չի նշանակում: Ես շատ փոքր ֆիգուր եմ, որ գնամ Ռուսաստան եւ ինչ-որ հարցեր լուծեմ:

Ֆելիքս Եղիազարյան