Ռոմանտիզմի ու անգրագիտության շաղախ

Ոստիկանապետ Ալիկ Սարգսյանի օրոք մեր ոստիկանությունն ու իր լրատվական ծառայությունը շատ ռոմանտիկ են դարձել. գրական-գեղարվեստական դիտարկումներ են անում, նեղացածի կեցվածքով բողոքում, որ իրենց չեն սիրում ու չեն աջակցում, անարգանքի սյունին գամում իրենց քննադատող լրագրողներին: Երեկ ոստիկանությունը հերթական գրությունն է ուղարկել մեզ՝ "Անհրաժեշտ պարզաբանում" վերնագրով, որտեղ անդրադարձել են օրերս Վահան Հովհաննիսյանի հայտարարությանը, որը զարմացել էր, թե ինչպես են ոստիկանները պահանջում, որ մարդիկ Ազատության հրապարակում շրջեն "պասպորտները բացած", եւ հայտարարել էր, թե ոստիկանության պարտականությունների մեջ չի մտնում զբոսնողների ինքնությունը պարզելը՝ "հայտնի մարդն էլ ունի զբոսնելու իրավունք, անհայտ մարդն էլ": Հիմա տեսնենք, թե ինչ է ասում ոստիկանությունը՝ ամոթխածորեն չնշելով Վահան Հովհաննիսյանի անունը. "Օրերս զանգվածային լրատվամիջոցներն անդրադարձել էին ԱԺ պատգամավորներից մեկի՝ ճեպազրույցում հնչեցրած խիստ տարօրինակ հայտարարությանը։ Պատգամավորը, անդրադառնալով ՀԱԿ"ի վերջերս կազմակերպած "քաղաքական զբոսանքներին, հղում էր արել միջադեպի վերաբերյալ ոստիկանության հաղորդագրությանը, որտեղ իբր ասվել էր, թե "անհայտ անձինք փորձել են զբոսնել" Ազատության հրապարակում։ Պատգամավորն այնուհետեւ տարակուսել է՝ արդյոք Երեւանում իրավունք ունեն զբոսնել միայն հայտնի՞ անձինք կամ ընդհանրապես՝ ՀՀ քաղաքացուց պահանջվում է անձնագիրը բաց պահա՞ծ զբոսնել...



Շտապենք փարատել պատգամավորի տարակուսանքը. ոստիկանության հաղորդագրության մեջ պարզորոշ ասված է. "Վերջին օրերին Հայ ազգային կոնգրեսի երիտասարդ ակտիվիստները պարբերաբար փորձեր են կատարում  օրենքով սահմանված կարգի խախտմամբ անցկացնելու  զանգվածային միջոցառում Ազատության հրապարակում։ Փորձեր, որոնք ուղղված են իրավապահների հետ բախումներ սադրելուն, հասարակական կարգը խախտելուն"։ Եւ մնում է իսկապես տարակուսել՝ ի՞նչ նկատառումով է հարգելի պատգամավորը աղավաղել ոստիկանության հաղորդագրության տեքստը եւ ի՞նչ տրամաբանությամբ է կառուցել իր հետագա մտարկումները քաղաքացու իրավունքների եւ ոստիկանության պարտականությունների վերաբերյալ։ Իսկ գուցե պաշտոնական հաղորդագրություններին հղում անելիս պարզապես պետք է ավելի ուշադիր ու պատասխանատո՞ւ լինել"։



ՀԳ - Այժմ մեր զարմանալու հերթն է. այս հաղորդագրությունն ասում է, որ ոստիկանությունը "Հայ ազգային կոնգրեսի ակտիվիստներին" ի սկզբանե համարում է իրավախախտներ եւ կարծում է, որ նրանք էականորեն տարբերվում են "անհայտ անձանցից": Նաեւ, որ "Ազատության" հրապարակում զբոսնելը նշանակում է "սահմանված կարգի խախտմամբ զանգվածային միջոցառում" կազմակերպել, ինչը պետք է պատժվի: Իսկ "փորձեր, որոնք ուղղված են իրավապահների հետ բախումներ սադրելուն, հասարակական կարգը խախտելուն" արտահայտությունն ընդհանրապես ոչինչ չասող, ոչ իրավական ձեւակերպում է, որը չի կարող մարդկանց զբոսնելու իրավունքը ոտնահարելու պատճառ դառնալ: