Վարչապետի՞, թե՞ նախագահի հրաժարականն են պահանջում
Անցած ուրբաթ կայացած ՀՀԿ գործադիր մարմնի նիստի ժամանակ ՀՀԿ «արմատականները» հարց են բարձրացրել իշխանափոխություն պահանջող ուժերին ու անձանց պատժելու, իրենց տեղը դնելու, շարժումն արմատախիլ անելու մասին: Երբ վրդովված կարծիքները գերակշռել են, եւ ակնհայտ է դարձել, որ իշխող կուսակցության մեջ որոշակի խուճապ կա, խոսել է ՀՀԿ փոխնախագահ Հովիկ Աբրահամյանը, ասել է՝ դուք ինչի՞ եք զայրանում, ըստ էության, իմ հրաժարականն են պահանջում: Նկատի է ունեցել, որ արտահերթ խորհրդարանական ընտրությունների դեպքում խորհրդարանական նոր մեծամասնություն կձեւավորվի, որի ներկայացուցիչ վարչապետը ինքը չի կարող լինել: Մանավանդ որ իր եւ խնամու՝ Ծառուկյանի հարաբերությունները վատացել են այն օրվանից, երբ ԱԺ-ում հանդիմանելով ընդդիմությանը, նա ասաց. «Նոր մարտի մե՞կ եք ուզում»: ԳՄ նիստի մասնակիցներին վարչապետը հանգստացրել է, ասելով, որ ինքը խոսել է մարզպետների հետ՝ մարզերում շարժման շտաբներ չեն ձեւավորվում, եւ իշխանափոխությանն ուղղված այլ քայլեր էլ չկան:
Հավանաբար, այս լուրերն են պատճառ դարձել, որ նախօրեին արդեն ԲՀԿ-ականները, հանձին Ստեփան Մարգարյանի, հայտարարեցին, որ իրենք իշխանափոխություն ասելով՝ հասկանում են Սերժ Սարգսյանի հրաժարականը: Ի դեպ, վերջերս Գագիկ Ծառուկյանի աջ թեւը դարձած Ստեփան Մարգարյանի խոսքն այս շրջանում կարելի է համարել ԲՀԿ առաջնորդի, ուստիեւ եռյակի պաշտոնական տեսակետ:
Կարծիքներ