Ինչու չեն միավորվում արևմտյան հոսանքին հարող «մարգինալները»
Ոչ իշխանական եռյակի արտաքին եւ ներքին քաղաքական գծի մեջ չտեղավորվող ուժերն ու գործիչները նախորդ հանրահավաքում ՀՀ առաջին նախագահի կողմից մարգինալներ (լուսանցքային) անվանումն ստացան: «Մարգինալների ջղաձգումներին» Տեր-Պետրոսյանն անդրադարձավ Եվրասիական տնտեսական միությանն ընդդիմանալու կոնտեքստում՝ հայտարարելով, որ ԵՏՄ-ին անդամակցությունն անշրջելի փաստ է, ինչին ի պատասխան, «մարգինալներից» մեկն ասում է. «Անշրջելին ծերությունն է»: Չնայած սրան, «լուսանցքային ուժերը» շարունակում են դատապարտել ԵՏՄ-ին անդամակցությունը եւ պնդել, որ ՀՀ-ի միակ ճշմարիտ ուղին Եվրամիություն գնալն է:
Արդեն տեղյակ եք, որ նոյեմբերի 17-18-ին ԵՏՄ-ին անդամակցության համաձայնագիրն ԱԺ-ում կդրվի քվեարկության: Ինչպես են գնահատում իրավիճակը ԵՏՄ-ին դեմ ուժերն ու գործիչները, արդյոք հնարավոր չե՞ն համարում միավորումը եւ միասնական ճակատով պայքարը: Առաջին նախագահի գնահատականների եւ որակումների վերաբերյալ «Ժողովրդավարական հայրենիք» կուսակցության առաջնորդ Պետրոս Մակեյանն ասաց. «Ես կարծում եմ, որ Արամ Սարգսյանի ու բոլորի մասով սահմաններն անցան, ովքեր իրենց հետ համաձայն չեն: Իմ կարծիքով, դա այսօրվա գործող իշխանության ոճն է, դեռ ավելի վատ, ինչ վերաբերում է համախմբվելուն, ապա խնդիրը չպետք է դնեն ոչ մեկ, ոչ էլ մյուս ուժերի շուրջ համախմբման մասով:
Այսինքն՝ ոչ ԵՏՄ, ոչ ԵՄ, այլ Հայաստանի շահերի շուրջ համախմբում»: Մակեյանը հիշեցնում է իր, «Քրիստոնեաժողովրդական վերածնունդ» կուսակցության առաջնորդ Սոս Գիմիշյանի, Աշոտ Մանուչարյանի ու այլոց նախաձեռնությամբ ստեղծված շարժման մասին, որը դեռ խմորման փուլում է: «Ես անձամբ մասնակցում եմ, փորձում եմ աջակցել, եւ օր առաջ պետք է լինի Հայաստանը… ոչ Եվրասիական եւ ոչ արեւմտյան արժեհամակարգը, մենք փորձում ենք Հայաստանի արժեհամակարգն ստեղծել: Մենք փորձում ենք ընդլայնել մի ուղղություն, որը Հայաստանի շահերն է սպասարկելու»: Մակեյանն ակնարկում է, որ այդ շահերը համընկնում են արեւմտյան արժեքների հետ, քանի որ իրենց կուսակցություններն էլ դրա կրողն են, բայց համախմբման քայլերի մասին խոսք չկա: Արեւմտյան ճակատ ստեղծելու անհրաժեշտություն դեռ չի տեսնում նախկին քաղբանտարկյալ Ազատ Արշակյանը: «Նոր շարժումը, կարծում եմ, ձեւավորման ընթացքում է, հիմա մենք ինքնաբացահայտման ենք գնում: Սկզբից հայտարարում ենք, որ այդպես ենք մտածում, իսկ երբ կրիտիկական քանակը կձեւավորվի, վերջին հաշվով՝ նաեւ թիրախը, եւ կլինի պայքարը: Հիմա մտահղացումն է հայտնի, որին մենք դեմ ենք: Հակառակորդը նույնպես ձեւավորման ընթացքում է, մենք էլ չգիտենք, թե դեռ ինչ է դա նշանակում: Առայժմ դրանք հայտարարություններ են, որի դեմ մենք էլ ենք նույնն անում, հենց որ իրենք կանցնեն գործի, եւ Ասիան կներխուժի Հայաստան, այդ ժամանակ մենք էլ կկազմակերպվենք, համաչափ պայքար կսկսվի»:
Ըստ Ազատ Արշակյանի, առայժմ բացահայտվում են նրանք, ովքեր պատրաստ են զոհաբերությունների գնով պատրաստել ՀՀ-ի ինքնիշխանությունը: «Մենք չենք հայտարարում մեզ Եվրամիության կողմնակիցներ, քանի որ հայ մարդու կուլտուրան, արժեհամակարգը եվրոպական է, հակառակն ասիական է, եւ ստացվում է, ուրեմն, ընդունում են Չինգիզ խանի արժեհամակարգը: Մենք դեմ ենք մեզ պարտադրվող ասիական արժեհամակարգին»: Ըստ Ազատ Արշակյանի, դեպի ԵՄ միտինգների անհրաժեշտությունը բխելու է եռակողմ հարաբերություններից: «Այսինքն՝ մենք, եվրոպական ու ասիական համակարգը կլինի, եւ այս եռանկյունու մեջ պետք է ձեւավորվի մեր շարժումը, դա փոխկապակցված պայքար պետք է լինի, առայժմ մենք չենք տեսնում միավորվելու, ճակատ ստեղծելու անհրաժեշտությունը»: Ըստ մեր զրուցակցի, դեռեւս ինքնապաշտպանության հայտ են ներկայացնում:
Կարծիքներ