Կվճարի կաշխատի, չի վճարի՝ չի աշխատի. Վաղարշ Աբրահամյան

«Ոսկու աշխարհ» առեւտրի կենտրոնի աշխատակից Նելլի Հարությունյանը, որն ընտանեկան խնդիրների պատճառով անհետացել էր այս տարվա օգոստոս ամսին եւ հայտնաբերվել նոյեմբերի 2-ին, դեռ աշխատանքի չի գնում:

«Ոսկու աշխարհ» առեւտրի կենտրոնի տնօրեն Վաղարշ Աբրահամյանից Hraparak.am-ը հետաքրքրվեց՝ Նելլին կրկին կաշխատի կենտրոնում, թե ոչ պատասխանեց. «Նա աշխատանքի չի եկել: Էդ Նելլիի ձեռը ես կրակն եմ ընկել, էնքան են հարցնում ժուռնալիստները, ես ինչ կապ ունեմ նրա հետ: Ինքը տեղ ունի կաշխատի, ինքը գիտի իրա մարդը, իրա ընտանքիը գիտեն, ինձ մի հարցրեք ես տեղյակ չեմ, կվճարի կաշխատի, չի վճարի՝ չի աշխատի»: Հարցին՝ երկու ամսվա գումարը Նելլի Հարությունյանը վճարել է, Վաղարշ Աբրահամյանը պատասխանեց. «Տեղյակ չեմ, նրանք բանկերով են աշխատում, փոխանցումներ են անում, ես հո բոլորին չեմ հետեւի տեսնեմ՝ ով է փոխանում, ով ոչ»:

Ավելի վաղ տեղեկացրել էինք, որ 2015թ. օգոստոսի 21-ին Ն.Հարությունյանի ամուսինը՝ Ա.Հարությունյանը, գրավոր հաղորդում է տվել, որ կինը նույն օրը՝ ժամը 17:00-ի սահմաններում, դուրս է եկել Երևան քաղաքի Խորենացի 24 հասցեում գործող «Վաղարշ և որդիներ կոնցեռն» ՍՊ ընկերության ոսկու տոնավաճառից, որից հետո նրանից որևէ տեղեկություն չկա:

Դեպքի առթիվ Երևան քաղաքի քննչական վարչության Կենտրոն և Նորք-Մարաշ վարչական շրջանների քննչական բաժնում հարուցվել է քրեական գործ՝ ՀՀ քրեական օրենսգրքի 110-րդ հոդվածի 1-ին մասով (Ինքասպանության հասցնելը): Այնուհետև, ՀՀ քննչական կոմիտեի նախագահի հանձնարարությամբ, քննության արդյունքները քննարկվել են, և արարքը վերաորակվել է՝ ՀՀ քրեական օրենսգրքի 104-րդ հոդվածի 1-ին մասով (Դիտավորյալ սպանություն):

Նախաքննությամբ պարզվել է, որ Ն.Հարությունյանը 2007 թվականից Երևան քաղաքի Մ.Խորենացի փողոցի թիվ 24 հասցեում գործող` «Վաղարշ և որդիներ կոնցեռն» ՍՊ ընկերության ոսկու տոնավաճառում զբաղվել է ոսկյա զարդերի առուվաճառքով:

Միաժամանակ պարզվել է, որ վերջինս, 2015թ. փետրվար ամսից սկսած, վաճառքից հետո գումարները վճարելու պայմանով ոսկյա զարդեր է ձեռք բերել, որի դիմաց դեռևս ունի գումարային պարտավորություններ: Նա հայտնաբերվել է նոյեմբերի 2-ին:

Ն.Հարությունյանը որպես վկա հարցաքննվել է և հայտնել է, որ ընտանիքում ստեղծված իրավիճակի պատճառով որոշել է խզել ամուսնու հետ ունեցած կապերը և 2015թ. օգոսոտոսի 21-ին՝ աշխատանքն ավարտելուց հետո, պատահական տաքսի ավտոմեքենայով մեկնել է Լեռնային Ղարաբաղի Հանրապետություն և մինչև 2015թ. նոյեմբերի 02-ը բնակվել գյուղերից մեկում՝ չհայտնելով կոնկրետ որ գյուղում է մնացել: Հաղորդաշարերից տեղեկացել է, որ իր անհետ կորելու դեպքի առթիվ քրեական գործ է հարուցվել և որոշել է վերադառնալ:

Նելլի Կարապետյան