Հերթական դեկլարատիվ, պոպուլիստական հայտարարությունը, որը ոչ մի լավ բան չի կարող տալ, վնասից բացի
![Հերթական դեկլարատիվ, պոպուլիստական հայտարարությունը, որը ոչ մի լավ բան չի կարող տալ, վնասից բացի](https://hraparak.am/uploads/images/2024/06/image_750x_667a4fc178867.jpg)
Նիկոլ Փաշինյանի աշխատակազմը, որը ղեկավարում է ԿԳՄՍ նախկին նախարար Արայիկ Հարությունյանը, Ադրբեջանի նախագահի աշխատակազմին նամակ է հղել` առաջարկություն է արել, որտեղ մասնավորապես ասվում է. «Վերջին շրջանում Ադրբեջանի Հանրապետության պաշտպանության նախարարությունը պարբերաբար տեղեկատվություն է տարածում, թե Հայաստանի Հանրապետության ՊՆ ստորաբաժանումների կողմից տեղի են ունենում հրադադարի ռեժիմի խախտումներ: Չնայած այն հանգամանքին, որ Հայաստանի Հանրապետության պաշտպանության նախարարությունը հերքել է բոլոր այդ մեղադրանքները, Ադրբեջանը շարունակում է այդօրինակ տեղեկատվության տարածումը: Ի շարունակություն Հայաստանի Հանրապետության վարչապետի՝ սույն թվականի հունիսի 15-ին արված հայտարարության եւ ելնելով նրանից, որ Հայաստանի Հանրապետության կառավարության կամքն է՝ թույլ չտալ լարվածության առաջացում, Հայաստանի վարչապետի աշխատակազմն Ադրբեջանի նախագահի աշխատակազմին դիվանագիտական խողովակներով առաջարկել է ստեղծել հրադադարի ռեժիմի խախտման դեպքերի հետաքննության երկկողմ մեխանիզմ: Հայաստանի Հանրապետության վարչապետի աշխատակազմն առաջարկում է մեկնարկել նշված մեխանիզմի գործնականացման աշխատանքները»:
ԱԱԾ նախկին տնօրեն Միքայել Համբարձումյանից հետաքրքրվեցինք` ՀՀ ազգային անվտանգության տեսանկյունից ի՞նչ է սա նշանակում, արդյո՞ք չի նշանակում, որ ՀՀ Ազգային անվտանգության ծառայության եւ պաշտպանության նախարարության աշխատանքը կասկածի տակ է դրվում, նրանց հեռացնում են իրենց բուն գործառույթներից եւ դա հանձնում են վարչապետի աշխատակազմին, որը նման գործառույթներ չունի:
«Ուզում են նման խումբ ստեղծել, որպեսզի կանխեն պրոցեսները, կրակոցներ չեն եղել, լինելու դեպքում էլ ցանկանում են հասկանալ պատճառները, եթե սուբյեկտիվ պրոցեսներ կան, դրանց տալ գնահատականներ: Այդ մարդն Ադրբեջանի հետ գնում է խաղաղության, ինչի՞ վրա եք զարմանում: Այդ կոնտեքստում այն, ինչ տեսնում եք, լրիվ նորմալ է: Եթե քաղաքական մոտեցումն այն է, որ Հայաստանն ամեն գնով ցանկանում է հասնել խաղաղության, ապա այսպես էլ պետք է լիներ: Այս մարդիկ իրենց քաղաքական ուղեծրում նպատակ են դրել ամեն կերպ հասնել խաղաղության, դրա հետ մեկտեղ, եթե գնում են խաղաղության, ապա պետք է համագործակցության եզրեր գտնեն, որպեսզի կարողանան համագործակցել Ադրբեջանի հետ՝ տարբեր խնդիրների, հարցերի հետ կապված: Հարցերից մեկն էլ կրակոցներն են, պարբերաբար դրանք լինում են, գուցե հիմնական պատճառներից մեկն էլ այն է, որ Ադրբեջանը պարբերաբար հայտարարություններ է անում, որ զինվորականները կրակ են բացում իրենց ուղղությամբ, բայց հայկական կողմը հերքում է այդ լուրերը: Ենթադրում եմ` հենց այս հանգամանքով է պայմանավորված, ցանկանում են Ադրբեջանի սադրանքները, ստերը հերքել: Պետք է մի մարմին, որը կասի` եղե՞լ են կրակոցներ, թե՞ չեն եղել, կամ՝ ո՞ւմ կողմից են եղել»,- ասաց Համբարձումյանը: Եթե Ձեր պաշտոնավարման շրջանում լիներ նման որոշում, հայտարարություն, ի՞նչ գնահատական կտայիք դրան, ԱԱԾ-ն այսօր եթե աշխատեր ի շահ պետության, ի՞նչ պետք է աներ այս պարագայում։ «Հարցին պետք է նայել ընդհանուր քաղաքական կոնտեքստում, եթե քաղաքականությունն այն է, որ հայկական կողմը եզրեր է փնտրում, պրոցեսներ է տանում՝ խաղաղության պայմանագրին հասնելու, այդ կոնտեքստում` լավ են անում, վատ են անում, դա էլ առանձին թեմա է, բնականաբար, պետք է նման քայլերի գնան: Պետք է քայլ անեն, որպեսզի Ադրբեջանի հետ ինչ-որ մարմին ստեղծեն, որը ռեալ կարտացոլի սահմանում տեղի ունեցող պրոցեսները՝ փոխադարձ կրակոցների եւ սադրանքների հետ կապված: Հայաստանն այսօր չի անի քայլեր, որոնք պատերազմ կհրահրեն, որովհետեւ ընդհանուր քաղաքականությունը միտված է, այսպես կոչված, խաղաղությանը: Նրանք նույնիսկ չափից դուրս զիջումների գնով են պատրաստ գնալ խաղաղության, իսկ դա արդարացված է կամ արդարացված չէ՝ դա էլ ժամանակը ցույց կտա: Այնուամենայնիվ, չպետք է այդ քայլերն անեն մեր ազգային արժանապատվության եւ շահերի հաշվին»,- նշեց նա:
Արդարադատության գեներալ-մայոր Թաթուլ Պետրոսյանն էլ, անդրադառնալով թեմային, նշեց. «Սա այն դեկլարատիվ ու պոպուլիստական հայտարարություններից է, որոնք Փաշինյանն անում էր: Այդքան շո՞ւտ մոռացանք` նա ժամանակին հայտարարում էր, որ պետք է օգտակար մեխանիզմներ ստեղծել` համատեղ հանձնաժողովներ, սպառազինությունը հավասարակշռելու տեսանկյունից: Սա՝ այն դեպքում, երբ մեկ օրվա ընթացքում Ադրբեջանը մի քանի անգամ հայտարարում է, որ հայկական կողմը մեկ օրվա ընթացքում` յոթ անգամ կրակել է: Սա ոչ միայն ազգային անվտանգության տեսանկյունից է խնդիր, այլեւ դարպասները բոլորի առաջ վերջնականապես բացելու: Արդեն որերորդ տարին է՝ եվրոպացի դիտորդները գալիս են, նրանց մի մասն էլ զինվորական գործիչներ են, բա նրանց բանուգործն ի՞նչ է, թող նրանք ասեն` ո՞ր կողմն է կրակ բացում առաջինը: Սա հերթական մեխանիզմն է, որը կարող է մերձեցնել հայ-թուրքական հարաբերությունները: Ոչ մի լավ բան այս պրոցեսը չի կարող տալ, վնասից բացի: Նմանատիպ դեկլարատիվ հայտարարությունները ողջունում է նաեւ ԱՄՆ-ն»:
Կարծիքներ