Չի բացառվում, որ հենց Կարեն Կարապետյանն էլ լինի․ Գալուստ Սահակյան

Ո՞վ կառաջադրվի ԱԺ նախագահի պաշտոնում։ Այս հարցում ԱԺ ՀՀԿ խմբակցության ղեկավար Գալուստ Սահակյանը Hraparak.am-ի հետ զրույցում ասաց, որ չի բացառվում՝ ԱԺ արդեն իսկ 130 պատգամավորներից յուրաքանչյուրն էլ թեկնածու լինի։

Մամուլում շրջանառվող անուններից մեկը՝ որպես ԱԺ նախագահի հիմնական, ֆավորիտ թեկնածու, ՀՀԿ-ական պատգամավոր Կարեն Կարապետյանն է։ Հաշվի առնելով Հովիկ Աբրահամյանի դեպքը, երբ մամուլը հենց իրեն էր համարում ՀՀ 13-րդ վարչապետը,  Գալուստ Սահակյանը չի բացառում, որ այս անգամ ևս մամուլը ճիշտ դուրս գա և հիմա էլ ԱԺ նախագահ դառնա Կարեն Կարապետյանը։

«Բայց եթե խոսքը վերաբերում է պաշտոնական մակարդակով քննարկումներին, ապա այդ հարցով դեռևս քննարկում չի եղել, բայց հնարավոր եմ համարում»,-ասաց ՀՀԿ խմաբկցության ղեկավարը։

Ինչ վերաբերում է իր՝ ԱԺ նախագահ դառնալու հավանականությունը, ինչը ևս չի բացառվում նույն մամուլի կողմից, Գ․ Սահակյանն ասաց․ «Ես վաղուց արդեն իմ դերակատարումն ունեմ, այնպես որ իմ պաշտոնը իմ պաշտոնն է»։

ՀՀԿ-ում դեռևս չեն քննարկել նաև այն հարցը, թե ով կզբաղեցնի Հովիկ Աբրահամյանի՝ պատգամավորական թափուր մնացած տեղը խորհրդարանում։ Ցուցակով, սակայն, հերթական համարը Լեռնիկ Ալեքսանյանն է, սակայն արդյոք հենց ի՞նքը կլինի ՀՀԿ-ական նոր պատգամավորը, թե՞ մեկ այլ ոք, ՀՀԿ խմբակցության ղեկավարն ասաց, որ դեռևս հայտնի չէ։

Վահե Մակարյան