Միգուցե ՀՀԿ-ի մոտ վերականգնվե՞լ է գրգռվելու տենդենցը

Թեպետ քառյակում դեռ լեզու չեն գտնում համատեղ հանրահավաքի անցկացման հարցում, բայց սահմանադրական փոփոխությունների հարցն արդեն թեժացել է ՀՀԿ-ԲՀԿ տիրույթում: ՀՀԿ գործադիր մարմնի նիստում Սերժ Սարգսյանի հայտարարություններին Գագիկ Ծառուկյանի պատասխան հարցազրույցն անարձագանք չմնաց: Իշխանությունն «աբարոտկա» ֆռռաց ոստիկանապետ Վովա Գասպարյանի եւ ոստիկանական զորավարժությունների միջոցով՝ «թեժ աշուն» ծրագրողներին սպառնալով, որ պատրաստվում է «սառը ցնցուղ» կիրառել՝ օրորոցում խեղդելով քառյակի համատեղ հանրահավաք անցկացնելու փորձերը: Սրան զուգահեռ, լրատվամիջոցներով տեղեկություններ տարածվեցին, որ Սերժ Սարգսյանն իր նախաձեռնությամբ Ծառուկյանի հետ հանդիպել է, որին մասնակցել է նաեւ Հովիկ Աբրահամյանը: Եվ որ Սերժ Սարգսյանին չի հաջողվել համոզել Ծառուկյանին՝ հետ կանգնել սահմանադրական փոփոխությունների դեմ պայքարից: Չնայած ԲՀԿ-ին «արքայական» առաջարկ է արվել՝ նախագահի ներկայացուցչական պաշտոնը եւ «թագավորության կեսը»՝ նախարարական մեծաքանակ պորտֆելներով եւ մանդատների մոտ կեսով: Հովիկ Աբրահամյանն էլ, բնականաբար, ապագա վարչապետացուն է: Եվ միայն ԱԺ նախագահի «համեստ» պաշտոնն է իրեն հարմար գտել Սերժ Սարգսյանը: Դժվար է ասել՝ եթե նման առաջարկ է արվել, ինչու է հրաժարվել Ծառուկյանը եւ ինչպես է պատկերացնում իր եւ իր թիմի լիարժեք հաղթանակը: Սակայն փաստ է, որ անհանգիստ են ոչ միայն իշխանության դաշտում, այլեւ հանրահավաքի հարցն էլ վերջնական չէ: Իսկ հանրահավաքը կոչված է ընդդիմության, հատկապես ԲՀԿ-ի ուժը ցուցանելուն: Երեկ զրուցեցինք ԲՀԿ խմբակցության պատգամավոր Լյովա Խաչատրյանի հետ, ով Վովա Գասպարյանին խորհուրդ տվեց ոստիկանապետի լիազորություններով զբաղվել եւ «ծառայել ժողովրդին»:

- Փաստորեն, դուք նույնպես վճռական եք տրամադրված, դուք նույնպես դեմ եք սահմանադրական փոփոխություններին եւ կարծում եք, որ դա իշխանության վերարտադրությանն է ուղղված:

- Ես միշտ կողմնակից եմ այն տեսակետին, որին նախագահն է կողմնակից, եթե երկրի նախագահը դեմ է, ուրեմն դա իրականացնելու պիտանի չէ:

- Հավանաբար, նկատի ունեք կառավարման մոդելի փոփոխությունը, երբ ամիսներ առաջ Սերժ Սարգսյանն էլ հայտարարեց, որ իրեն ավելի հոգեհարազատ է գործող մոդելը:

- Այո, երկրի նախագահը, երբ ներկայացնում էր սահմանադրական բարեփոխումները, հայտարարեց, որ դեմ է: Բայց ես կողմ եմ խորհրդարանական հարյուր տոկոս համամասնական ընտրակարգին ու կողմ եմ եղել միշտ:

- Իսկ Ձեզ մոտ հարց չի՞ առաջացել՝ ո՞վ է Սերժ Սարգսյանի կամքին դեմ գնացել եւ որոշել, որ կառավարման մոդելը, այնուամենայնիվ, պետք է փոխվի:

- Արջի քոթոթները երբ որ մեծանում են, սկսում են ի՞նչ անել... Երեք հատ կետ դրեք, ես ասացի այն, ինչ ասացի:

- Դուք եւ քառյակի առնվազն երկու ուժ հայտարարում եք, որ խորհրդարանական մոդելն իշխանության, այսինքն՝ Սերժ Սարգսյանի վերարտադրությանն է նպաստելու:

- Ուրեմն կուսակցությունն ունի քաղաքական դիրքորոշում, կատարել է հայտարարություն, լրիվ կողմ եմ:

- Բայց Ծառուկյանն ասաց, որ թող հայեցակարգը հրապարակվի, նոր կծանոթանանք ու կխոսենք, Դուք տեղյա՞կ եք՝ ինչպե՞ս է նպաստելու:

- Ես կուսակցական կարգապահությանը կողմնակից եմ եղել միշտ, առավել եւս, որ հասուն տարիքում եմ կուսակցական եղել:

- Իշխանության ճամբարից ձեզ հակադարձում են, որ նախկինում դուք եւ էլի ուրիշ ուժեր էիք ձգտում այդ համակարգին, իսկ հիմա ընդդիմանում եք, որովհետեւ կուսակցության ղեկավարը մանկուց նախագահ դառնալու երազանք է ունեցել ու ուզում է այն իրականացնել:

- Ճամբարը միշտ փշալարերով է պատված լինում, եթե իշխանականը ճամբար է, ապա թող իր փշալարերի սահմաններում էլ մնա: Համամասնականին կողմ եմ, մնացածը՝ ինչպես կուսակցությունն է իր մարտավարությունն ընտրել: Իմիջիայլոց, ԲՀԿ-ի եւ երկրի նախագահի տեսակետն այս հարցում համընկնում է, երկուսն էլ դեմ են խորհրդարանական համակարգին, եթե օլիգարխիան ցանկանում է վերարտադրվել, եւ երկրի նախագահը, եւ ԲՀԿ-ն, եւ քառյակը դեմ են: Եվ հետո, դուք շփոթում եք «խորհրդարանական համակարգ» հասկացողությունը «հարյուր տոկոս համամասնական ընտրակարգի» հետ: Մենք միշտ էլ կողմ ենք եղել 100 տոկոսանոց համամասնականին, իսկ դա չի նշանակում կառավարման մոդելի փոփոխություն: Նախկինում էլ մենք խորհրդարանական մոդելը չենք պաշտպանել, պաշտպանել ենք ընտրակարգը:

- Կարծում եք՝ քառյակին կհաջողվի՞ կանխել այդ փոփոխությունները:

- Նախագահը դեմ է այդ փոփոխություններին, քառյակից եռյակն առնվազն դեմ է, ես կարծում եմ, որ այդպես էլ կլինի:

- Փաստորեն, ի տարբերություն շատերի, Դուք կարծում եք, որ սահմանադրական բարեփոխումների հանձնաժողովն ազատ է գործել, եւ իշխանությունը չի միջամտել այդ գործերին:

- Եթե իշխանություն ասելով նկատի ունեք օլիգարխիան եւ կրիմինալը, միգուցե եւ ունեցել են, նախագահը եւ ԲՀԿ-ն, եւ առնվազն եռյակը դրա հետ առնվազն կապ չունի եւ դրան դեմ է արտահայտվել:

- Ո՞վ է օլիգարխիան, ի դեպ, ձեր կուսակցության ղեկավարն էլ մեծամասնականով է ընտրվել եւ այդ կարգավիճակն ունի:

- Խաղի կանոններն են այդպիսին եղել, եւ մենք ընդունել ենք այդ կանոնները, բայց ես անձամբ դեմ եմ եղել մեծամասնական ընտրակարգին եւ նույնիսկ ԱԺ ամբիոնից եմ ելույթ ունեցել:

- Դուք իսկապես կարծում եք, որ խնդիրը կառավարման մոդելի մեջ է, եւ եթե ընդունվի խորհրդարանական մոդելը, ի՞նչը կվատանա, եւ եթե մնա՝ ի՞նչը կլավանա:

- «Եթե»-ն ցանում են՝ չի բուսնում, երբ որ «եթե»-ն կլինի, կառարկայանա, նոր կխոսենք:

- Խորհրդարանական մոդելն ինչո՞վ է սպառնում մեր երկրին, քաղաքացիներին, եւ ինչո՞ւ է ՀՀԿ-ն շահագրգռված, որ այդ մոդելին անցնի:

- Համակարգը բացարձակապես կապ չունի, քաղաքական կամքի բացակայությունն է բոլոր չարիքների սկզբնաղբյուրը: Իսկ ընդհանրապես, երբ որ գրգիռ է առաջանում, ոչ մեկ դրա սկզբնաղբյուրի մասին չի մտածում, սկսվում է գրգռվել: Սովետական շրջանում դրա համար «բլո» էին օգտագործում, դա կոչվում էր «բլո», նապաստակներին էին տալիս՝ գրգռելու համար, միգուցե որոշ քաղաքական ուժերի մոտ վերականգնվե՞լ է այդ տենդենցը:

- Վստա՞հ եք, որ համատեղ հանրահավաք կլինի՝ իշխանափոխության պահանջով:

- Ես չգիտեմ, իշխանությունը կկայացնի որոշում, կհետեւենք որոշմանը: