Նորայր Մուրադխանյանը միտում չի տեսնում, որ «Օվիրի» պետերը ընտրություններից առաջ փոխվում են

Վլադիմիր Գասպարյանի հրամանով՝ 2014 թվականի հունիսի 12-ին  աշխատանքից ազատված անձնագրային եւ վիզաների վարչության պետ Նորայր Մուրադխանյանն Hraparak.am-ին հայտնեց, որ տարօրինակ որևէ բան չկա, որ  Ոստիկանության անձնագրային և վիգաների վարչության պետերը հաճախակի են փոփոխության ենթարկվում։

Ավելի վաղ հայտնել էինք, որ Սահմանադրական հանրաքվեին ընդառաջ ոստիկանապետ Վլադիմիր Գասպարյանը պաշտնանկ է արել Ոստիկանության անձնագրային և վիգաների վարչության պետ Միշա Սարդարյանiին: Նրան կփոխարինի տեղակալը՝ Մնացական Բիչախչյանը: 

Վերջին երկու տարում անձնագրային եւ վիզաների վարչությունը հասցրել է 2 պետ փոխել: «Միտում չեմ տեսնում, որ նրան այս ժամանակահատվածում են հեռացրել, ես ընդհանրապես ոչնչում միտում չեմ տեսնում»,-ասաց Մուրադխանյանը։ Նրա խոսքով՝ նոր պետը շատ գրագետ է եւ բանիմաց. «Նրա հետ աշխատել եմ, գրագետ անձնավորություն է»։ Իսկ թե որքանով գրագիտությունը կապահովի պաշտոնում երկարակեցություն, «Օվիրի» նախկին պետը որեւէ կանխատեսում չարեց: 

Իսկ ըստ ձեզ ինչում է թերացել Միշա Սարդարյանը, հարցրինք Նորայր Մուրադխանյանին. «Միշան էլ շատ գրագետ, բանիմաց անձնավորություն է, երևի իրեն պետք է հարցնեք, թե ինչումն է պատճառը»,-պատասխանեց նա։

Ի դեպ, Նորայր Մուրադխանյանն արդեն մեկ տարուց ավել է, ինչ աշխատանքից ազատվել էր մեկ այլ աշխատանքի տեղափոխվելու նպատակով, սակայն այդպես էլ այլ աշխատանքի չի անցել: «Դեռևս չեմ աշխատում, գտնվում եմ կադրերի ռեզերվում, հանգստանում եմ»,-ասաց սպասողական վիճակում գտնվող Մուրադխանյանը։

Ոստիկանպետից նեղացած չե՞ք, որ մինչև հիմա նոր պաշտոնի Ձեզ չի նշանակել. «Բացարձակ նեղացած չեմ, դեռ սպասում եմ, որ նոր աշխատանք կառաջարկեն»,-եղավ պատասխանը։

Իսկ թե որն է Մուրադխանյանի երազանքների պաշտոնը, «Օվիրի» նախկին պետը ասաց. «Ընդհանրապես չեմ երազում պաշտոնների մասին, մեր ծառայություն է, որտեղ նպատակահարմար գտնեն, այդտեղ էլ ծառայության կանցնեմ»։

Ի դեպ, Միշա Սարդարյանը մեր հեռախոսազանգերին չի պատասխանում, համակարգում ասում են, թե պաշտոնանկությունից հետո նա անհետացել է: