Բժիշկների համեմատ հարուստ, հարուստների համեմատ՝ աղքատ
Առողջապահության նախարար Լևոն Ալթունյանը մեկ ամիս է ինչ պաշտոնավարում է, բայց դժվարանում է որևէ գնահատական տալ, ԾԻԳ-երի, ՊՈԱԿ-ների կրճատման մասին հանձնարարականն էլ, որ տվել էր վարչապետը, դեռ ուսումնասիրության փուլում է. «Հանձնարարականը կկատարվի և կկատարվի լավագույնս, իսկ դրա համար պետք է ուսումնասիրել հարցը: Հարցը ուսումնասիրելու համար անհրաժեշտ է ևս 20-25 օր: Էսպես թե էնպես մենք 100 օրից պատրաստ կլինենք պատասխանել Ձեր հարցերին»:
-Կա՞ այդ տեսլականը, որտեղի՞ց եք սկսելու, ի՞նչ աշխատանքներ եք կատարելու:
Ես ասում եմ՝ ուսումնասիրություններ ենք կատարում: Առաջինը պետք է ուսումնասիրենք, կրճատենք և օպտիմիզացնենք, այն, ինչ պահանջում է վարչապետը:
-Ի՞նչ կարևոր փոփոխություն պետք է արվի, որ դուք տարիների ընթացքում տեսել եք և կարևոր եք համարում այն կատարել:
Դժվար հարց է, ես դրան կպատասխանեմ 100 օրվա ասուլիսով:
-Ոլորտում կոռուպցիոն ռիսկերն էլ են բազմաթիվ, դրա՞նք էլ եք ուսումնասիրելու:
Մեկ օրինակ բերեք:
-Բժիշկների հետ կապված, որ գումարներ են պահանջում:
Դուք կոռուպցիա համարո՞ւմ եք բժշկին նվիրած կոնյակը, ծաղիկները, գումարը, ի՞նչը:
-Պետական գումարներից զատ՝ այլ գումարներ են տրվում:
Քաղաքացիները թող չտան:
-Բայց պահանջում են:
Եթե պահանջում են, դա արդեն Դատախազության հարցերն են: Բժիշկների աշխատավարձերը բարձրացնենք, էֆֆեկտիվությունը բարձրացնենք և վերջապես քաղաքացիներին կրթենք, որ պետք չի մոտենալ բժիշկներին այդ հարցերով:
-Նույնիսկ տարվա կեսին պետպատվերների թիվը կրճատվում է:
Մենք աշխատում ենք դրա վրա: Ես հույս ունեմ, որ մյուս տարի այս ժամանակ այդ նույն հարցը դուք չեք տա:
-Նշեցիք, որ բժշկին կոնյակ, ծաղիկ տալ պետք չէ դիտարկել որպես կոռուպցիա: Դուք բժիշկ եք, Ձեր գործունեության ընթացքում եղե՞լ է, որ Ձեզ կոնյակ կամ այլ բնույթի նվերներ են արել:
Իհարկե եղել է, կոնյակ էլ են նվիրել, ծաղիկ չեն նվիրել:
-Գործադիրի կազմում դուք Ձեզ համարում եք հարո՞ւստ, թե՞ շատ հարուստ:
Դժվար է ասել, բժիշկների համեմատ հարուստ, շատ հարուստների համեմատ՝ աղքատ:
-Կառավարությունում ո՞վ է ձեզանից ավելի հարուստ:
Չեմ կարող ասել, դուք ավելի լավ կպատասխանեք այդ հարցին:
-Նախորդ անգամ նշեցիք, որ Մոսկվայի բնակարանը վաճառել եք, այստե՞ղ եք բնակարան գնել:
Ես նման բան չեմ ասել, որովհետև բնակարան չունեմ Մոսկվայում:
-Դուք եք նշել պարոն Ալթունյան:
Ես ասել եմ՝ Մոսկվայի ցանկացած բնակիչ, ով կվաճառի բնակարան, հարուստ կլինի:
-Հնարավոր համարո՞ւմ եք բժշկական ապահովագրության ներդրումը Հայաստանում:
Իհարկե համարում եմ, բայց դրա շուրջ դեռ աշխատանքներ չեն տարվում: Կան բազմաթիվ խնդիրներ, որոնք պետք է շտկել, մինչև պարտադիր ապահովագրությունը: Դա գումարների բաշխման մեթոդներից մեկն է, մենք ուսումնասիրում ենք մեթոդները և եթե հանգենք այն եզրակացությանը, որ պարտադիր ապահովագրությունը միակ հնարավոր մեթոդն է, խնդիրը կներկայացնենք իշխանությանը:
-Դուք արդեն պատկերացնո՞ւմ եք առողջապահության համակարգում կոռուպցիոն ռիսկերը որտե՞ղ են, ի՞նչ պետք է անեք:
Կոռուպցիոն ռիսկերը պատկերացնելը իմ աշխատանքը չի, մենք ուղղակի սկսել ենք նրանից, որ վերանայել ենք բոլոր նորմատիվ ակտերը, ես կարող եմ երաշխավորել, որ ներկա ժամանակ կոռուպցիոն ռիսկերը բացառված են, կոռուպցիա չկա և չի լինելու, դա վերաբերում է իմ պաշտոնավարման ընթացքում:
-Ձեր գալուց հետո կոռուպցիա չկա՞ համակարգում:
Ամեն դեպքում գումարների բաշխումը դադարեցվել է և կատարվում է ըստ օրենքի: Պետպատվերում կառուպցիա չկա:
-Կոռուպցիան միայն պետպատվերո՞ւմ է:
Իսկ էլ որտե՞ ղ է:
-Դուք ստուգե՞լ եք ԾԻԳերը, ՊՈԱԿ-ները ինչպես են աշխատում:
Ինչպե՞ս են աշխատում, բոլորը ինչ-որ բանի մասին խոսում են, բայց անուն չեն տալիս: Ձեր վարքագիծը նման է այն անեկդոտին՝ ես ամեն ինչ գիտեմ, ես էլ ձեր մասին ամեն ինչ գիտեմ:
-Պարոն նախարար, իշխող կուսակցության ներկայացուցիչները ակնկալիք ունեն, որ համագումարից հետո «Հանրապետական» կուսակցության շարքերը անկուսակցական նախարարները կհամալրեն: Մտադրություն ունե՞ք միանալու «Հանրապետականին»:
Դեռ ոչ:
Կարծիքներ