Գագիկ Բեգլարյանը եւ նրա ընտանիքի անդամները հրավիրվել են դատախազություն

ՀՀ գլխավոր դատախազության ապօրինի ծագում ունեցող գույքի բռնագանձման գործերով վարչությունն այս անգամ ուսումնասիրություն է սկսել Տրանսպորտի և կապի նախկին նախարար Գագիկ Բեգլարյանի, նրա կնոջը՝ Նունե Նիկոյանին, երեխաներին՝ Նատելլա և Հրանտ Բեգլարյաններին պատկանող գույքի առնչությամբ։

Ըստ դատախազության` նրանց անվամբ հաշվառված գույքը հանդիսանում է բռնագանձման առարկա: Ծանուցումը ստանալուն պես՝ մեկամսյա ժամկետում, նրանք պետք է ներկայանան ՀՀ գլխավոր դատախազության ապօրինի ծագում ունեցող գույքի բռնագանձման գործերով վարչություն, ծանոթանան գործի նյութերին և դրա վերաբերյալ դիրքորոշում ներկայացնեն:

Օրենքը նախատեսում է` եթե անձը հրաժարվում է ապօրինի ճանաչված գույքի 75 տոկոսից, մնացյալ 25 տոկոսը մնում է իրեն: Նկատենք, որ այս գործընթացը դեռեւս ընդամենը դատախազության տիրույթում է ընթացել, որեւէ գույքի հետ կապված բռնագանձման որոշում չի կայացվել եւ որեւէ անձի հետ հաշտության գործընթաց չի կայացել: Ավելին` դատական համակարգում կարծում են, որ այս օրենքը շատ թերի է եւ խոցելի` նման իրավակարգավորումներով որեւէ մեկի գույքը բռնագանձել չի ստացվելու: Իսկ եթե անգամ բռնագանձեն, ապա, անհամաձայնության դեպքում, անձը դատական կարգով կարող է այն վիճարկել մի քանի ատյաններում, ապա Եւրոդատարանում, որտեղ շատ մեծ է հավանականությունը հաղթելու, քանզի միջազգային իրավունքը շատ զգույշ է վերաբերվում սեփականության իրավունքին եւ դրա ապօրինի ծագումը հիմնավորելն անչափ բարդ է:

Նշենք, որ այս վարչությունը մեկ տարուց ավելի է, ինչ գործում է, իրականացվել է մոտ 250 ուսումնասիրություն, որից ընդամենը երկուսն է ուղարկվել դատարան։ Ուսումնասիրությունները վերաբերում են նախկին պաշտոնյաններին։