80 մլն դրամ բուժկենտրոնին
hraparak
13 Սեպտեմբեր 2010 | 09:27
0
Անցած տարի, երբ Համաշխարհային բանկը որոշեց նորոգել Գորիսի բժշկական կենտրոնը, այլ ոչ թե Կապանինը, ինչպես նախատեսված էր, Կապանի դաշնակցական քաղաքապետ Արտուր Աթայանը կոչով դիմեց գործարարներին: Քաղաքապետի խոսքով, ինքը նույնիսկ չէր սպասում, որ այսքան արձագանքող կլինի, ու կարճ ժամակամիջոցում տեսքի կբերվեն բժշկական կենտրոնի բաժանմունքները: Մինչ օրս 14 կազմակերպության ու անհատի կողմից տրամադրվել է 80 մլն դրամ, որից 40 մլն դրամը՝ միայն «Զանգեզուրի պղնձամոլիբդենային կոմբինատ» ՓԲԸ-ն է տվել: Այդ գումարով նորոգվել է Կապանի բժշկական կենտրոնի վիրաբուժական բաժանմունքի մասնաշենքը: Շինաշխատանքներն իրականացրել է «Կավարտշին» ՍՊԸ-ն:Նորոգվել եւ ժամանակակից տեսքի է բերվել մասնաշենքի երրորդ հարկաբաժնի միջանցքը, փոխվել են դռներն ու լուսամուտները, նորացվել է հատակը, կարգի են բերվել վիրահատարանն ու վիրակապարանը, ակնաբույժների եւ բուժքույրերի առանձնասենյակները, փոխվել են էլեկտրալարերը, լաբորատորիաներում տեղադրվել են օդափոխիչ սարքեր: Միաժամանակ ամբողջովին փոխվել է մասնաշենքի տանիքը: Կատարված աշխատանքներին ծանոթանալու համար երեկ հիվանդանոց է այցելել ԶՊՄԿ գլխավոր տնօրեն Մաքսիմ Հակոբյանը: Նա հետաքրքրվել է նաեւ հաստատության մյուս խնդիրներով:
Գլխավոր բժիշկ Սմբատ Օրբելյանը նշել է, որ կարեւորը մասնաշենքի ջեռուցումն է: Կոմբինատի գլխավոր տնօրենի խոսքով, իրենք տարեկան 6-8 մլն դոլարի ներդրում են կատարում հանրապետության տարբեր մարզերում ծրագրեր իրականացնելու համար` սկսած շինարարությունից մինչեւ մշակութային կամ մարզական միջոցառումների ֆինանսավորում: Մ. Հակոբյանը չբացառեց, որ ընկերության բաժնետերերի որոշմամբ հնարավոր են նոր ներդրումներ Կապանի բժշկական կենտրոնի այլ բաժանմունքների նորոգման համար:
Կարծիքներ