Առաջարկս է՝ «Արցախ» պաննոյի պատկերով նամականիշ թողարկել. Սամվել Խալաթյան
Նկարում պատկերվածը ՀՀ ժողովրդական նկարիչ, ՀՀ պետական մրցանակի դափնեկիր, Գեղարվեստի և գիտությունների Պետրովյան ակադեմիայի իսկական անդամ, ՌԴ գեղարվեստի ակադեմիայի պատվավոր անդամ, պրոֆեսոր Փարավոն Միրզոյանի «Արցախ» պաննոն է (կտավ, յուղաներկ, 400 x 800, 2010 թ.):
Հավերժի շնչով ապրող, բնության վեհագույն կերպարով և անդրջրհեղեղյան պատմության վկային վայել, հիրավի, շենշող մի անձնագիր-պատկեր է սա, որ իր հանգրվանն է գտել Հայաստանի ազգային պատկերասրահի ֆոնդում:
Արցախն այսօր ռազմական ու քաղաքական վայրիվերումների, մեր մտահոգությունների, լինել, թե չլինելու կենսորոշ սահմանագծի առանցքում է, և մոլորակի վրա ապրող ամեն մի հայ, անկախ իր քաղաքական հայացքներից, հայոց հնագույն այդ ոստանի պահպանման ու շենացման հույսն է փայփայում:
Այդ նպատակի իրականացման հնարավորությունների և միջոցների փնտրտուքում չպետք անտեսել ունեցած հոգևոր ներուժի դերակատարումը, ուստիև, առաջարկս է՝ «Արցախ» պաննոյի պատկերով նամականիշ թողարկել:
Ակնկալում եմ պատկան մարմինների դրական արձագանքը:
Սամվել Խալաթյան
Կարծիքներ