"Եւրատեսիլին" ընդառաջ

Որքան մոտենում է "Եւրատեսիլ 2010"-ը, այնքան թեժանում են տարբեր ֆորումներում քննարկումները, ասեկոսեները, անգամ անեկդոտները. "Եւա Ռիվասի "Եւրատեսիլի" շորը լինելու է Հրաչուհի Ութմազյանի 1-ինից 10-րդ դասարանի բոլոր շորերը իրար կպցրած",-ֆորումներից մեկում գրել է մի երիտասարդ, եւ այն բավական զվարճացրել է ֆորումի մասնակիցներին: "Եւրատեսիլ 2010"-ը սկսվել է երեկ, Նորվեգիայի Օսլո քաղաքում՝ 23 հազար տեղանոց "Տելենոր Արենե" մարզադաշտում եւ կավարտվի մայիսի 29-ին: Մրցույթի անցկացման համար արդեն ծախսվել է 17 միլիոն եւրո: Եւա Ռիվասը ելույթ է ունենալու մայիսի 27-ին՝ մրցույթի երկրորդ կիսաեզրափակիչում:

"Եւրատեսիլի" հայկական պատվիրակությունը որոշ փոփոխություններ է մտցրել "Apricot Stone" երգի բեմադրության պարային հատվածում։ Երկու օր առաջ Օսլոյում կայացել է մրցույթի երկրորդ փորձը: Նոր տարբերակում երեք բեք- վոկալիստները մոտենում են արհեստական ջրվեժին եւ ձեռքով ջուր են վերցնում։ Այս անգամ առաստաղից կախված փայլուն սպիտակ պղպջակները բարձրանում են այն պահին, երբ կորիզից սկսում է ծիրանենի աճել։ Եւրոպական բուքմեյքերական ընկերությունների կանխատեսումներով՝ Եւա Ռիվասը կզբաղեցնի 4-րդ հորիզոնականը, նույն կանխատեսումների համաձայն՝ հաղթող կճանաչվի Գերմանիայի ներկայացուցիչը՝ Լենան: Կանխատեսվում է նաեւ, որ հաղթական եռյակում կարող են հայտնվել Ադրբեջանի ներկայացուցիչ Սաֆուրան եւ Իսրայելի ներկայացուցիչ Հարել Սքաթը: Նշենք, որ Ադրբեջանի ներկայացուցիչ Սաֆուրան դեռեւս դպրոցական է: Ռուսական ֆորումներում շրջանառվում է այն խոսակցությունը, թե Ադրբեջանն իր նավթի շնորհիվ արդեն իսկ մրցույթում ապահովել է իր մասնակցի հաղթանակը: Հետաքրքիր է, որ Սաֆուրայի երկրպագուների շրջանակներում քիչ չեն նաեւ հայ երիտասարդները, որոնք ջերմ նամակներ են գրում Սաֆուրային: