Ֆլեշի Բարսեղի նկատմամբ ընտրված խափանման միջոցը վերացվեց

Երևանի ընդհանուր իրավասության դատարանի Ավանի նստավայրում Դավիթ Հարությունյանի նախագահությամբ դատարանը հրապարակեց պաշտպանի միջորդության որոշումը՝ բավարարելով այն։ Գլխավոր դատախազությունից «Հրապարակ»-ին հայտնեցին, որ դատարանը որոշել է ամբաստանյալների նկատմամբ ընտրված խափանման միջոցը վերացնել։

Նշենք, որ ամբաստանյալների պաշտպան Կրոմվել Գրիգորյանն երեկ դատական նիստին միջնորդեց` որպեսզի նախաքննության ընթացքում իր պաշտպանյալների նկատմամբ ընտրված խափանման միջոց` ստորագրություն չհեռանալու մասին վերացվի, և նոր խափանման միջոց չընտրվի՝ հաշվի առնելով նաև այն, որ համաներման կիրառման արդյունքում խափանման միջոցի կիրառումը չեղարկվում է:

Հիշեցնենք, որ Բարսեղ Բեգլարյանին մեղադրանք է առաջադրվել այն բանի համար, որ նա 2016թ. մարտ-ապրիլ ամիսների ընթացքում Արման Մկրտումյանի նկատմամբ բռնություն գործադրելով, ինչպես նաև կյանքի և առողջության համար վտանգավոր բռնություն գործադրելու սպառնալիքներով կատարել է ինքնիրավչություն` վերջինիս օրինական շահերին պատճառելով էական վնաս: Փաստական տվյալների համաձայն՝ Ն.Բեգլարյանին պատկանող «Ֆլեշ Մոտորս» ՍՊ ընկերությունից 2015թ. ընթացքում իրականացվել է առանձնապես խոշոր չափերի գույքի հափշտակություն, որի կատարման մեջ ընկերության սեփականատերն ու հարազատները մեղադրել են «Ֆլեշ Մոտորս» ՍՊ ընկերության նախկին կոմերցիոն տնօրենին և պահանջել վերականգնել ենթադրաբար պատճառված գույքային վնասը։