Աշիկ Անդրեյանը՝ Սամբոյի Եվրոպայի առաջնության չեմպիոն

«Պատմության մեջ առաջին անգամն էր, որ Սամբոյի Եվրոպայի առաջնությունը, որը տեղի ունեցավ Սերբիայի Նովի Սադ քաղաքում, մասնակցում էին 27 երկրներից միանգամից 3 տարիքային խումբ։ Առաջին օրը պատանիների խաղերն էին, երկրորդ օրը՝ երիտասարդները, երրորդ և չորրորդ օրերը՝ մեծահասակները։ Եվրոպայի առաջնության խաղերը՝ բաժանված   ըստ տարիքային խմբերի, միշտ տեղի են ունեցել տարբեր երկրներում»,-այս մասին «Հրապարակի» հետ զրույցում ասաց «Հայաստան» ՄՀԿ-ի Գյումրու մանկապատանեկան համալիր մարզադպրոցի Ձյուդոյի և Սամբոյի մարզիչ Նարեկ Սուքիասյանը։

Նշենք, որ սեպտեմբերի 15-18-ը  Սերբիայի Նովի Սադ քաղաքում անցկացված Սամբոյի Եվրոպայի առաջնությանը երիտասարդների պայքարում 58 կգ քաշային կարգում Հայաստանը ներկայացրեց Աշիկ Անդրեյանը` «Հայաստան» ՄՀԿ-ի Գյումրու մանկապատանեկան համալիր մարզադպրոցի սանը։ 

«Աշիկը մասնակցել է Հայաստանի առաջնությանը և զբաղեցրել է առաջին մրցանակային տեղը, որից հետո մասնակցել է Գառնիկ Հովհաննիսյանի հուշամրցաշարին, որը միջազգային մրցաշար է։ Այստեղ էլ է առաջին մրցանակային տեղ գրավել։ Անցած տարվա հոկտեմբերին մասնակցել է նաև Աշխարհի առաջնության խաղերին և զբաղեցրել 3-րդ մրցանակային տեղ և դարձել բրոնզե մեդալակիր։ Մոտ մեկ տարի պատրաստվել էր Եվրոպայի առաջնության խաղերին։ Սամբոյի Եվրոպայի առաջնությանը Աշիկը գերազանց մրցելույթներ ունեցավ։ Կարողացավ 8-0 հաշվով հաղթանակ գրանցել Իսպանիան ներկայացնող մարզիկի նկատմամբ, կիսաեզրափակիչ գոտեմարտում հաղթել ռուս մարզիկին 4-1 հաշվով, իսկ եզրափակչում բացարձակ միավորների տարբերությամբ հաղթեց Բելառուսիան ներկայացնող մարզիկին և հռչակվեց Եվրոպայի առաջնության չեմպիոն»,-ասաց մարզիչը։ 

Ըստ Նարեկ Սուքիասյանի, Սամբոյի միջազգային ֆեդերացիայի որոշմամբ՝ հոկտեմբերի 14-16-ը, Հայաստանում տեղի կունենան Սամբոյի առաջնության խաղերը, որին կմասնակցեն մոտ 30 երկիր, ինչպես նաև  Հայաստանի առաջնության հաղթողները։