Հայաստանն ու Ադրբեջանն այս տարի խաղաղության պայմանագիր կկնքեն․ Շոլց
Հայաստանի և Ադրբեջանի միջև խաղաղության համաձայնագրի ստորագրման շանսերն ավելի մեծ են, քան երբևէ։ Այդ մասին Բեռլինում Ադրբեջանի նախագահ Իլհամ Ալիևի հետ կայացած մամուլի ասուլիսում հայտարարել է Գերմանիայի կանցլեր Օլաֆ Շոլցը։
Նրա խոսքով, Ալիևի հետ բանակցությունների ընթացքում առաջին հերթին քննարկվել է Հայաստանի և Ադրբեջանի միջև հակամարտությունը։
«Մենք համակարծիք ենք, որ այս հակամարտությունը պետք է լուծվի խաղաղ ճանապարհով»,- ասել է նա:
Շոլցը նաև ընդգծել է, որ Հայաստանի և Ադրբեջանի միջև խաղաղության պայմանագիրը կարող է ստորագրվել այս տարի։
«Կարծում եմ՝ 2024 թվականը կարող է և պետք է լինի խաղաղության տարի տարածաշրջանում։ Սա հնարավորություն և պատասխանատվություն է բերում», - հայտարարել է Գերմանիայի կանցլերը։
Նա նաև նշել է, որ գերմանական կողմը գոհ է սահմանազատման հետ կապված՝ Երևանի ու Բաքվի միջև ձեռք բերված նախնական պայմանավորվածությունից։
«Բեռլինն աջակցում է այս դինամիկայի պահպանմանը և այդ ուղղությամբ համարձակ քայլ կատարելուն»,- հավելել է նա։
Կարծիքներ