«Ձեռք մեկնիր եղբորդ» բարեգործական ծրագրով հանձնվեց հոբելյանական 30-րդ բնակարանը
Գերաշնորհ տեր Սեպուհ արքեպիսկոպոս Չուլջյանի օրհնությամբ՝ օրերս տեղի ունեցավ «Ձեռք մեկնիր եղբորդ» բարեգործական ծրագրով գնված 30-րդ բնակարանի հանձնման արարողությունը:
Բնակարանը գնվեց Բելգիայում բնակվող պոլսահայ Ալին Հասերի կողմից, ով ի հիշատակ իր լուսահոգի հոր Զավեն Հասերի նվիրաբերեց երկհարկանի տունը Սպիտակի շրջանի Արջուտ համայնքի բնակիչ Գագիկ Սարգսյանի ընտանիքին:
Սրբազան Հոր օրհնությամբ՝ նոր հանձնված բնակարանում Սուրբ Գրիգոր Նարեկացի Առաջնորդանիստ Մայր եկեղեցու հոգևոր հովիվ Տեր Վահան քահանա Ազարյանը կատարեց տնօրհնյաց արարողություն: Ներկա էին նաև Արջուտի համայնքապետ Վարդան Մկրտչյանը, Արջուտ համայնքի միջնակարգ դպրոցի տնօրեն Գայանե Մեսրոբյանը, ուսուցիչները, երեխաների դասընկերները և ընտանիքի հարազատները:
Վանաձորաբնակ ազգաբնակչության հանգանակությամբ նախորդ երկու տարիներին գնվել են միայն վանաձորաբնակ Սամվել Քալաշյանի, Նունե Ղազախեցյանի և Մելսիդա Փարսադանյանի բնակարանները:
Կարծիքներ