Խոզի օրգանները մարդու օրգանիզմում

Կառավարության երեկվա նիստի օրակարգում ընդգրկված հարցերից հանրությանը հրատապ իրազեկելու թեմա ընտրվեց "Մարդուն օրգաններ եւ հյուսվածքներ փախպատվաստելու մասին" օրենքում փոփոխություններ կատարելու նախագիծը, ինչի մասին էլ լրատվամիջոցներին ազդարարեց առողջապահության փոխնախարար Հայկ Դարբինյանը: Ըստ օրենքի փոփոխության, փոխպատվաստում չի համարվում այն օրգանների տեղադրումը, որի դեպքում օրգանում արյան շրջանառություն չի կատարվում: Կենդանիներից կամ արհեստական վերցված օրգանների եւ հյուսվածքների օգտագործումը բժշկագիտության մեջ համարվում է ոչ թե փոխպատվաստում, այլ իմպլանտացիա, ինչը այլ բժշկական միջամտություն է ու չի կարող կարգավորվել "Մարդուն օրգաններ կամ հյուսվածքներ փոխպատվաստելու մասին" օրենքով:



Հայաստանում տեղի են ունենում իմպլանտացիոն բնույթի բազմաթիվ վիրահատություններ, իսկ փոխպատվաստում  միջին հաշվով՝ 20 անգամ ավելի: "Օրինակ, մազն են իմպլանտացիա անում, ատամները, արհեստական ոսկորներ ու անոթներ",-բացատրում էր Հայկ Դարբինյանը: Փոխնախարարի խոսքով՝ այս օրենքով արգելվում է փոխպատվաստման համար օրգաններ վերցնել կալանավայրերից: "Բայց հետո պարզվեց, որ երիտասարդը հիվանդ է, ունի հեռանկարներ ու հարազատներ չունի, հարազատներից մեկը, ով որ ի վիճակի է օրգան տալու, գտնվում էր կալանավայրում, փոխեցինք, արդեն իրավունք ունի կալանավայրում գտնվողը օրգանը տա հարազատին",-մանրամասնեց Դարբինյանը:



Հայաստանում առաջին անգամ երիկամի փոխպատվաստում իրականացրել է առողջապահության նախկին նախարար  Արա Բաբլոյանը 1996-1997 թվականներին: Փոխպատվաստումը բարդ գործընթաց է ու թանկ արժե, օրինակ մինչեւ 2 հարյուր հազար եվրո: Նշենք, որ  միջազգային պրակտիկայում մարդու օրգանիզմում  փոխպատվաստում են նաեւ խոզի, ոչխարի, այծի, կապիկի ներքին օրգաններ՝ լյարդ, փայծաղ, երիկամ եւ սիրտ: Իսկ մեզ մոտ առայժմ փոխպատվաստում են միայն երիկամ: Թեեւ մեզ մոտ խոզի օրգաններ դեռ չեն փոխպատվաստել, սակայն լրագրողները սկսեցին հետաքրքրվել, թե մարդիկ ինչպես են ընդունում խոզի օրգանով փոխպատվաստվելու երեւույթը, հոգեբանական խնդիրներ առաջանո՞ւմ են:



Դարբինյանը պատասխանեց. "Եթե հիվանդը ունի լուրջ խնդիր, ու հանգիստ այդ օրգանները հանում են, ինչո՞ւ չպատվաստեն": Լրագրողները կատակով հարցրին, թե պատվաստումից հետո ընդհանուր նմանություններ ձեռք բերո՞ւմ են, Դարբինյանն էլ կատակով պատասխանեց. "Ոչ, միայն արյան փոխներարկումից հետո կարող է նմանություններ առաջանալ":  Խոզի սրտի փոխպատվաստման մասին լսելուն պես լրագրողները սկսեցին քննարկել, թե պաշտոնյաներից ովքեր կարող են պատվաստված լինել: