Ձեր ցերեկով ման եկած տեղերը մենք գիշերով ենք ման եկել

Ինչպես արդեն տեղեկացրել էինք, Հայաստանի վարչապետ Հովիկ Աբրահամյանը ոչ իշխանական եռյակի կողմից ներկայացված 12-կետանոց պահանջների շուրջ քննարկումների պատրաստակամություն է հայտնել:

«Եռյակի կողմից ներկայացված 12 կետերից շատերը նոր չեն. դրանց կառավարությունը հրապարակայնորեն անդրադարձել կամ իրականացրել է: Այդուհանդերձ, մեր դիրքորոշումները քարացած չեն, և մենք պատրաստ ենք քննարկումների: Առաջարկում եմ յուրաքանչյուր հարցի համար կառավարության և ընդդիմության կողմից նշանակել 3 հոգանոց թիմ՝ յուրաքանչյուր կետի շուրջ փաստարկների վրա հիմնված դիրքորոշում ներկայացնելու նպատակով: Ես ակնկալում եմ, որ ընդդիմությունը ևս կառուցողական կմոտենա համագործակցության մեր առաջարկին»,- նշվում է Հովիկ Աբրահամյանի՝ ըստ էության, խորհրդարանական եռյակին ուղղված առաջարկի մեջ: Փաստորեն Հովիկ Աբրահամյանը հերթական սայթաքումն է թույլ տվել՝ առաջարկելով ընդդիմության կողմից 3 հոգանոց թիմ ներկայացնել: Ինչո՞ւ երեք և ոչ թե 5 հոգանոց թիմ: Մի՞թե ընդդիմության 12 կետերը եռյակի մտքի փայլատակման արդյունքն է:

Ինչպես ասում են՝ «какой привет- такой ответ»: Եռյակն այսօր փառավորապես հրաժարվել է հետագա քննարկումներից, իսկ որոշ եռյակիստներ էլ հայտարարել են, որ ՀՀ կառավարությունը բավականին ժամանակ է ունեցել այդ կետերի շուրջ լուծումներ տալու, իսկ իրենք պատրաստ են քննարկել միայն արտահերթ խորհրդարանական ընտրությունների հարցը:

Սա ոչ այլ ինչ է, եթե ոչ՝  ՀՀ կառավարության և ոչիշխանական  եռյակի համատեղ ջանքերով ընդդիմության 12 կետից բաղկացած պահանջները օրակարգից իսպառ հանելու կոմբինացիա, որը նպատակ ունի մոռացնել տալու բարեփոխումների պահանջը և օրակարգի բերելու մի այնպիսի անպտուղ պահանջ, ինչպիսին ԱԺ արտահերթ ընտրությունների պահանջն է: Եվ եռյակն էլ  թքած ունի, որ ԸՕ-ն դեռ չի բարեփոխվել ըստ իր, այսպես կոչված, «պահանջի»՝ անցնել 100 տոկոս համամասնական ընտրակարգի:

Հիշենք նաև, որ ժամանակին ՀԱԿ-ը հենց այդ պահանջով էր երկխոսում Սերժ Սարգսյանի հետ, և այդ երկխոսության արդյունքը հայտնի է ամենքին: