Հովսեփ Խուրշուդյանը երեկվա ծեծկռտուքի վերաբերյալ վաղը վերլուծական «ստատուսով» հանդես կգա

«Ժառանգություն» կուսակցության անդամ Անահիտ Բախշյանը չի հավատում, որ իրենց ոկսւակցության երիտասարդները կարող էին հարձակվել և ծեծել «Քաղաքացիական գիտակցություն» ՀԿ-ի ներկայացուցիչներին։ Տիկին Բախշյանը, սակայն, չցանկացավ այլևս որևէ մեկնաբանություն տալ այս թեմայով՝ նշելով, որ տեղյակ չէ մանրամասներից։
Կուսակցության մեկ այլ անդամ Հովսեփ Խուրշուդյանն էլ Hraparak.am-ին ասաց, որ ինքն այս առիթով արդեն ֆեյսբուքյան իր էջում որոշակի գրառում կատարել է, սակայն վաղը ավելի հանգամանալից «ստատուս» կգրի և ամեն ինչ կմեկնաբանի։

«Ես իմ էջում իմ ֆեսյբուքյան ընկերների համար դա կգրեմ»,-ասաց նա՝ նշելով, որ գրառումը հրիմնված կլինի փաստերի ու դրանցից բխող եզրակացությունների վրա։
Հարցին՝ առկա իրադրությամբ, որքան որ ուսումնասիրել է, ի՞նչ կարող է ասել, քանզի ի սկզբանե այնպես տարածվեց, ասես՝ «Ժառանգության» ներկայացուցիչներն են ծեծել այդ ՀԿ-ի տղաներին, պարոն Խուրշուդյանն ասաց․ «Ես ինչ որ գրել եմ իմ էջում, էնտեղ նշել եմ, որ սարքվել է։ Ինձ թվում է՝ դա արդեն իմ վերաբերմունքի մասին ինչ-որ բան խոսում է, չէ՞»։

-Ձեր կարծիքով՝ կարո՞ղ է այս ամենը կապված է Դավիթ Սանասարյանի՝ վերջին շրջանում ցուցաբերած ակտիվության հետ, որ չեզոքացնեն նրան։

-Վաղը ես մանրամասն դրա մասին կխոսեմ։

-Ինչու՞ թողնել գործը վաղվան, եթե կարելի է այսօր անել։

-Որովհետև պատճառներ կան դրա համար, ես դեռ ինֆորմացիա եմ հավաքում, ես դրա միջոցով շատ ավելի կարևոր ինֆորմացիաներ եմ ուզում համադրել և վերլուծել։

-Իսկ ձեր տղաներից տեղյա՞կ եք՝ ինչպե՞ս է նրանց առողջական վիճակը, և ոստիկանական բաժանմունքում նրանցից որևէ մեկը գտնվու՞մ է, արդյոք։

-Բարեբախտաբար նորմալ է առողջական վիճակը, որքան ես գիտեմ․․․ և, որքան գիտեմ, իրենք հարցաքննվել են ու նաև դատաբժշկական ուղեգիր են ստացել։

-Իրե՞նց վրա են կրակել ատրճանակով։

-Ճիշտ կլինի՝ իրենց հանդիպեք, իրենցից ճշտեք, ես իրենց հետ չեմ հանդիպել ուղղակի այս առիթով։

-Այդուհանդերձ՝ այս ամենը «Ժառանգության» դեմ ծրագրված հատուկ քա՞յլ էր, ըստ Ձեզ, թե՞․․․

-Վաղը, վաղը ամեն ինչ կգրեմ․․․

-Լավ, իսկ ի՞նչ եք պատրաստվում գրել վաղը՝ ինչ-որ ուսւոմնասիրություննե՞ր եք կատարելու։

-Ես գրել էի, որ, այո, ես պետք է համադրեմ իմ տեղեկությունները և, հատկապես, էն վերաբերմունքը, էն կարծիքները, որ արտահայտում են էսօր երեք հիմնական օղակները՝ բլոգերները, բլոգերը և լրատվական միջոցները։ Ես էս առիթով ուզում եմ տեսնել իրենց դիրքորոշումներն ու իմ եզրակացություններն անել տարբեր օղակների վերաբերյալ։

Վահե ՄԱԿԱՐՅԱՆ