Ես՝ որպես մարզի թիվ մեկ պաշտոնյա
Կոտայքի մարզպետ Ռոմանոս Պետրոսյանը, պարզվում է, համարում է, որ մարզի թիվ մեկ պաշտոնյան ինքն է, ու դա այնպիսի խրոխտ կեցվածքով ու տոնայնությամբ է հայտարարում, որ թվում է, թե ոչ թե Կոտայքի մարզի, այլ ողջ հանրապետության թիվ մեկ պաշտոնյան է ինքը, որի դեմ «առհասարակ խաղ չկա»։ Մեզ պատմեցին, որ դեկտեմբերի 16-ին մեկնարկած հերթական ձմեռային զորակոչի ժամանակ, Կոտայքի մարզի Աբովյան քաղաքում, Աբովյանի Սուրբ Հովհաննես եկեղեցու մոտ, որտեղ նորակոչիկներին իր օրհնության խոսքն է ասել տեղի հոգևորականը, ապա մի զինվորական է խոսք ասել, Աբովյանի քաղաքապետը և մարզպետը։ Ռոմանոս Պետրոսյանը, խորանին մեջքով կանգած, դիմել է նորակոչիկների ծնողներին՝ ասելով, որ ինքը, որպես այս մարզի թիվ մեկ պաշտոնյա, վստահեցնում է, որ իրենց զավակները այսուհետ որևէ խնդիր չեն ունենա։
Մարզպետի պաթետիկ ու վերամբարձ ելույթը տարակուսանք է առաջացրել ոմանց մոտ, թե որտեղից նրան այդքան վստահություն, որ ինքը կարող է լուծել զինվորների բոլոր խնդիրները, կամ արդյոք միայն պաշտոնը բավարա՞ր է, որ մարդն այնքան մեծամտանա, որ իրեն «մարզի թիվ մեկ պաշտոնյան» համարի։
Կարծիքներ