Գիտնականի հիշատակին
Ստեղծագործական ուժերի ծաղկման շրջանում կյանքից հեռացավ Հայաստանի Հանրապետության ֆինանսական համակարգի ստեղծման ակունքներում կանգնած, քառորդ դար բարձր որակավորմամբ ֆինանսիստներ պատրաստած, ՀՊՏՀ ֆինանսների ամբիոնի վարիչ, տնտեսագիտության դոկտոր, պրոֆեսոր Աշոտ Բորիսի Սալնազարյանը:
Նրա ողջ մարդկային էությունը պարփակվում է մեկ բառի մեջ՝ «շիրակցի». ուղղմիտ, մարդասեր, դրական էներգիայով լեցուն, հողը սիրող անձնավորություն:
Չգիտեմ ի՞նչ խոսքեր ասել: Հիշել, թե ինչպե՞ս ենք Հեռավոր Արևելքում մասնակցել ուսանողական շինարարական ջոկատի աշխատանքներին, և թե ես ինչպես եմ իրեն հաճախակի «սադրել» բանավեճի մեջ մտնել Հայաստանում կորպորատիվ արժեթղթերի շուկայի զարգացման հիմնախնդիրների շու՞րջ: Նա երկրի տնտեսության զարգացման համար անհրաժեշտ ներդրումների գլխավոր աղբյուր էր դիտում կորպորատիվ արժեթղթերի շուկայի զարգացումը, նկատի ունենալով, թե որքան անկայուն են օտարերկրյա ներդրումների հոսքերը: Նա ապավինում էր մեր ներքին ֆինանսական ներուժին, ինչպես որ արցախցին հայ ժողովրդի այս ճակատագրական ժամանակահատվածում ապավինում է իր բազկի զորությանը:
Պրոֆեսոր Սալնազարյանը զուտ ակադեմիական անձնավորություն չէր, նա այդ բնագավառ մուտք էր գործել՝ ունենալով պատկառելի փորձառություն ինչպես պետական կառավարման համակարգում, այնպես էլ մասնավոր հատվածում:
Անուրանալի է նրա ավանդը երկրի ֆինանսական գիտության, մասնավորապես՝ արժեթղթերի շուկայի զարգացման բնագավառում նրա գիտական ձեռքբերումները, որոնք ունեցել են նաև գործնական նշանակություն, արտացոլվել են յոթ տասնյակից ավելի գիտական հրապարակումներում, օրենսդրական և նորմատիվային փաստաթղթերում:
Նա մշտապես աշխատել է կրթական ծրագրերի կատարելագործման ուղղությամբ՝ նպատակ հետապնդելով բարձրացնել ոչ միայն իր սաների մրցունակությունն աշխատաշուկայում, այլև պատրաստել պետական ֆինանսների կառավարման բնագավառին արժանի մասնագետներ:
Մենք հրաժեշտ ենք տալիս շիրակցու հարուստ կոլորիտով մի կենսախինդ անհատականության, որի մարդկային բարձր հատկանիշները միշտ հարգանքով կհիշեն իր գործընկերներն ու սաները:
Գագիկ Վարդանյան
Տնտեսագիտության դոկտոր, պրոֆեսոր
Կարծիքներ