Նախկին նախարարի որդուն ազատել են պաշտոնից

Սոցիալական ապահովության նախկին նախարար Նարինե Բալայանի որդուն ազատել են պաշտոնից։ Եղիշե Աբելյանը, ով հարկայինի հնաբնակ աշխատակիցներից է, տարբեր տեսչություններում եղել է պետ, տեղակալ, եղել է Սեւանի հարկային տեսչության պետ, Գորիսի հարկային տեսչության պետ, ապա տեղակալ, այժմ հեռանում է համակարգից։ Ըստ ամենայնի՝ համակարգից հեռանալու պատճառը հարկային տեսչության պետի տեղակալի պաշտոնի հետ չհամակերպվելն էր։ Մինչ հեռանալը Եղիշե Աբելյանը տեւական ժամանակ արձակուրդի մեջ էր։

Hraparak.am-ը կապ հաստատեց Եղիշե Աբելյանի հետ, սակայն վերջինս չցանկացավ պատասխանել հարցերին․ «Բոլոր հարցերով դիմեք պետեկամուտների կոմիտեի լրատվական բաժին»․- ասաց Եղիշե Աբելյանը։ Փորձեցինք տեղեկությունը ճշտել ՊԵԿ լրատվականից եւ ուրբաթ օրվանից սպասում ենք պատասխանի: Մեզ փոխանցեցին, որ ինֆորմացիան կարող են փոխանցել միայն երեքշաբթի օրը։

Հիշեցնենք, որ Նարինե Բալայանը, ով աշխատանքի եւ սոցիալական հարցերի նախարարն էր 1985-1990 թվականներին, եղել է Գերագույն խորհրդի պատգամավոր, գլխավորել սոցիալական հարցերի հանձնաժողովը, հետագայում նշանակվել է սոցապ նախարարի խորհրդական եւ զբաղվել է հասարակական գործունեությամբ։