Նորից Վարդգես Գասպարին

Երեկ Երեւանի Կենտրոն եւ Նորք-Մարաշ համայնքների ընդհանուր իրավասության դատարանի կարգադրիչները թույլ չտվեցին դատարանի շենք մտնել ընդդիմության ակտիվիստ, այժմ ամբաստանյալ Սարգիս Գեւորգյանի մորն ու եղբորը, ինչպես նաեւ նախկին քաղբանտարկյալ Վարդգես Գասպարիին: Ավելին՝ զանգահարեցին ոստիկանության Կենտրոնի բաժին ու ոստիկան կանչեցին՝ Վարդգես Գասպարիին բերման ենթարկելու նպատակով: Պատճառն այն էր, որ Գասպարին անօրինական էր համարել դատարան մտնելու եւ Սարգիս Գեւորգյանի ու Դավիթ Քիրամիջյանի դատին մասնակցելու իր իրավունքը սահմանափակելու փաստը եւ ինքնաբուխ ակցիա էր արել, բացականչելով՝ "Բանդիտներ" ու "Ամոթ մեր արդարադատությանը":



Կենտրոնի ոստիկանությունից կայծակնային արագությամբ երկու ոստիկան եկան ու փորձում էին բռնի ուժով Գասպարիին տանել բաժին: Սակայն տեսնելով, որ լրագրողները հետաքրքրություն են ցուցաբերում, նրանցից ավագը որոշեց տեղում գրավոր բացատրություն վերցնել, միաժամանակ կրկնելով՝ "Ես եկել եմ Ձեզ հրավիրեմ բաժին": Գասպարին հրաժարվեց, պատճառաբանելով, որ դրա համար ինքը պիտի ստանա ծանուցագիր, որը չի ստացել: Ոստիկանը, տեսնելով, որ չի կարողանում իրականացնել բերման ենթարկելու առաքելությունը, կատաղությունից հարձակվեց մեր ֆոտոխցիկի վրա ու հարվածեց, պահանջելով չլուսանկարել իրեն: Հետո վերցրեց Գասպարիի բացատրությունն այն մասին, որ չի ցանկանում բացատրություն գրել, եւ հեռացավ: