Դաշնակցականները գոհ են Բաքվում Սոցինտերնի հավաքին իրենց մասնակցությունից

Բաքվում ավարտված Սոցինտերնի ժողովին հայկական պատվիրակության մասնակցությունը կարելի է արդյունավետ համարել: Այս մասին լրագրողների հետ հանդիպմանը հայտարարեցին ՀՅԴ  Բյուրոյի անդամ, հանձնախմբի համանախագահ Մարիո Նալբանդյանը եւ ՀՅԴ Հայ Դատի գրասենյակի տնօրեն, քաղաքական գործիչ Կիրո Մանոյանը: Վերջինիս խոսքով, արդյունավետ էր այն, որ հայ պատվիրակները բացեցին ադրբեջանցի լրագրողների աչքերը շատ հարցերում, որոնց մասին նրանք աղճատված պատկերացում ունեին:



«Բացի այդ, մենք արժանի պատասխան տվեցինք Սոցիալ–դեմոկրատական կուսակցության ղեկավար Արազ Ալիզադեի կեղծ մեղադրանքներին  եւ դիտարկումներին: Մեր դիրքորոշումը արձագանք գտավ Ժողովի պատվիրակների մոտ: Այդ առումով կարելի է ասել, որ հանդիպումը հաջողված է»,-նշեց Մարիո Նալբանդյանը: Նա նաեւ ասաց, որ հայկական պատվիրակությունը Բաքվում արժանացել է համապատասխան ընդունելության, պահպանվել են անվտանգոււթյան միջոցները, վերաբերմունքը արարողակարգային էր:



«Եթե հաշվի չառնենք իմ վիզայի հետ կապված խնդիրները, ինչի պատճառով ես ստիպված  էի օդանավակայանում սպասել 5 ժամ, ամեն ինչ նորմալ էր»,-նշեց Նալբանդյանը: Կիրո Մանոյանն էլ ասաց, որ նոյեմբերի 15-16-ը Փարիզում կկայանա Սոցինտերնի խորհրդի հավաքը, որի ընթացքում Հայաստանի եւ Ադրբեջանի պատվիրակները պետք է ներկայացնեն իրենց եզրակացությունը արցախյան հարցի վերաբերյալ:



«Մենք արդեն ներկայացրել ենք մեր առաջարկությունները, սակայ կկարողանա՞ Ալիզադեն ներկայացնել իրենը, դժվար է ասել, չէ որ մեկ ամսից Ադրբեջանում կկայանան խորհրդարանական ընտրություններ»,-ասաց Մանոյան: Նա նաեւ նշեց, որ Սոցինտերնի հաջորդ ժողովը կկայանա հունվարին`Աստանայում:



Անդրադառնալով Արազ Ալիզադեի հետ ունեցած հեռուստաբանավեճին, Կիրո Մանոյանը նշեց, որ ադրբեջանցի քաղաքական գործիչը փորձել է հեռուստաեթերն օգտագործել նախընտրական քարոզարշավ իրականացնելու նպատակով:



«Բանավեճի ընթացքում նա այնպիսի անհեթեթություններ էր ասում, որ նույնիսկ ցանկություն չկար արձագանքելու, սակայն ստիպված էի: Օրինակ Ալիզադեի պատկերացմամբ «Ախթամարը» միայն հայկական կոյնակ է : Կամ էլ թե նրա համոզմամբ, Ղարաբաղում այսօր ավելի քիչ հայ է ապրում, քան մինչեւ նրա անկախությունը:



News.am