Հիմա Հովիկ Աբրահամյանի մատը խա՞ռն է, թե՞ ոչ

«Ձեր թվերն իմ թվերի հետ չեն բռնում, դրա համար խնդրում եմ գրի առեք իմ ասածները, որ հետո կարողանաք պատասխանել»: Ֆինանսների փոխնախարար Պավել Սաֆարյանին դիմեց ՀԱԿ խմբակցության պատգամավոր Արամ Մանուկյանը, երբ կրթության եւ գիտության ոլորտի 2015 թվականի բյուջեի նախագիծն էր ներկայացվում: Իսկ մինչ բուն հարցին անցնելը Մանուկյանը հիշեցրեց մի պաշտոնական տվյալ՝ 2007 թվից այս կողմ, պաշտոնական թվերով, 100 հազար աշակերտ պակասել է: Այնուհետեւ Արամ Մանուկյանն անցավ Արարատի մարզին սննդի հատկացման գումարներին, հետաքրքրվելով՝ արդյոք Հովիկ Աբրահամյանի մատը խա՞ռն է այստեղ, թե՞ ոչ: «Սննդի հատկացման հոդվածում եւ սոցիալապես անապահով խավերի համար դասագրքերի հատկացման համար հոդվածում Արարատի մարզը երկու տեղ էլ առաջին տեղում է, այն դեպքում, երբ Արարատի մարզն աշակերտների քանակով յոթերորդն է Հայաստանում: Եթե ձեր կառավարությունը գնում է հավասարեցման քաղաքականության, ապա ինչո՞ւ Արարատի մարզում սոցիալապես անապահով ընտանիքներին երեխաների դասագրքերի վարձավճարների փոխհատուցումը 10.5 մլն դրամ է կազմում, որը մյուս մարզերի համեմատ առաջին տեղում է: Հովիկ Աբրահամյանի գործոնն էստեղ կա՞, թե՞ չէ»,-հարցրեց Արամ Մանուկյանը՝ նույն օրինակը բերելով նաեւ սննդի հետ կապված, եւ նշեց, որ բոլոր մարզերին հատկացված 580 միլիոնից միայն 330 միլիոնն Արարատի մարզին է հատկացվել. «Սա ի՞նչ քաղաքականության արդյունք է, էդ թվերը կարեւոր չեն, ինձ մի՛ ասեք դրանք, որովհետեւ սա կոնկրետ քաղաքականություն է»:

Պավել Սաֆարյանն էլ, մինչ բուն թեմային անցնելը, նախ փորձեց հեգնել Արամ Մանուկյանին՝ հիշեցնելով անցյալից ինչ-որ դրվագներ. «Ես լավ չեմ հասկանում, թե Դուք 2007 թիվն ինչու բերեցիք: Ինձ ակամա հիշեցրիք այն, երբ մի ժամանակ բոլոր ցուցանիշները 1913 թվի հետ էին համեմատում»: Այնուհետեւ Սաֆարյանը, հակառակ Մանուկյանի հորդորին, պատասխանը ձեւակերպեց թվերով, ոչ թե քաղաքականությամբ:
«Անկախ Ձեր գնահատականներից, որոնք իրականությանը բոլորովին չեն համապատասխանում, ես Ձեզ համոզված եմ ասում՝ իրականության մեջ լրիվ ուրիշ պրոցեսներ են տեղի ունեցել դպրոցական սննդի էդ ծրագրի գծով: Եվ էդ ծրագիրը մեկնարկել է վաղուց, երբ Ձեր հիշատակած մարդիկ կառավարությունում չէին աշխատում: Այդ պիլոտային ծրագիրը՝ երեք մարզերի համար, սկսվել է Ռուսաստանի կողմից, որը կիսակրթական-կիսագյուղատնտեսական ծրագիր էր: Իսկ թվերը հետեւյալն են՝ Արարատի մարզում աշակերտների թիվը 14 հազար 62 է, Սյունիքում՝ 6 հազար 97, Վայոց Ձորի մարզում՝ 2 հազար 553»,-ասաց Պ. Սաֆարյանը՝ նկատելով. բնական է, որ եթե աշակերտների թվաքանակը տարբեր է, պետք է տարբեր լինեն նաեւ հատկացված գումարները:

Ինչ վերաբերում էր հարցին, թե արդյոք հավասարաչա՞փ են բաշխված կրթության ծախսերը, Սաֆարյանն ասաց. «Կան ծրագրեր, որոնք հավասարաչափ են, նայած հավասարաչափ ասելով ինչ ենք հասկանում: Հավասար չէ, հավասարաչափ է, համամասնորեն է»:

ՀԱԿ պատգամավորին, սակայն, չբավարարեց փոխնախարարի պատասխանը. «Խնդրում եմ՝ հեգնանք չլինի: Արարատի մարզն ամենաանապահովը չի եւ ամենամեծաքանակը չի, եւ ես կրկին եմ նշում թվերը, որ 580 մլն դրամ է հատկացվել, որից 330 միլիոնը տրամադրվել է միայն Արարատի մարզին: Հարցս շատ կոնկրետ է՝ հիմա Հովիկ Աբրահամյանի գործոնը կա՞ էստեղ, թե՞ չկա: Ասեք՝ չկա, ու պրծնենք»: Փոխնախարարն օգտվեց հուշումից. «Դե չկա, իհարկե չկա»: Հետո, հատուկ ընդգծելով, որ ինքը շատ լուրջ է վերաբերվում Մանուկյանի հարցերին, կրկնեց նույն պատասխանը, որն էլի չբավարարեց պատգամավորին: Երկխոսությունը երկար կշարունակվեր, եթե չմիջամտեր նիստը վարող Արծվիկ Մինասյանը՝ խնդրելով պարզաբանումներն իրարից ստանալ արդեն նիստից դուրս:
2015 թվականի պետական բյուջեի նախագծով կրթության ոլորտին նախատեսված է հատկացնել 127 մլն 620 հազար դրամ:

Վահե ՄԱԿԱՐՅԱՆ