«Շառլ Էբդո». Եվրոպայի նո՞ր կյանքը
Եվրոպական մտքի, դեմոկրատական արժեքների համատեքստում «Շառլ Էբդո» երգիծական ամսագրի գրասենյակի վրա իսլամիստ ահաբեկիչների հարձակումը, լրագրողների, երգիծանկարիչների հանդեպ սոսկալի դաժանությամբ հաշվեհարդարը, կարող է շրջափուլային բնույթ կրել:
Կաթվածահարի դեմքով Ֆրանսիայի նախագահ Օլանդի հայտարարությունները, որ սա ահաբեկչություն է ողջ ֆրանսիայի դեմ, որ Ֆրանսիան թիրախում է, քանի որ ազատ երկիր է, որ իրենք պիտի ցույց տան բոլորին, որ միասնական են, պայքարեն բարբարոսության դեմ և պատժի ենթարկեն ահաբեկիչներին... մեղմ ասած այս ոչ բարդ հայտարարությունները դեպքի մասշտաբի համեմատ չափից դուրս սովորական են թվում:
Փարիզը իսկապես մեծ շփոթմունքի մեջ է: Փողոցներում ոստիկանական ջոկատներ և մեքենաներ: Ինչ-որ շենքերի, հաստատությունների դիմաց ակտիվ վերահսկողություն: Անջատում են Էյֆելյան աշտարակի լույսերը: Ֆրանսիան եռօրյա սուգ է հայտարարում: Կան կասկածյալներ, որոնց հետ իրավապահ մարմիններին հաջողվում է կապի մեջ մտնել, վարել բանակցություններ: Նրանք հայտարարում են, թե ուզում են մեռնել որպես նահատակներ: Համաշխարհային ակնառու լրատվամիջոցները հանդես են գալիս տարատեսակ վերլուծական հրապարակումներով և այդ անմարդկային տեսաձայնագրությունը, որ առկայծում է համացանցում՝ գրեթե ամենուր:
Հայտնի է, որ «Շառլ Էբդոն» իր հրապարակումների համար, (մասնավորապես Մուհամմեդ մարգարեին ծաղրանկարի) վաղուց խնդիրներ ուներ իսլամիստների հետ: Երգիծաթերթի գրասենյակը հարձակման էր ենթարկվել 2011թվականին, փորձել էին հրկիզել այն: Ֆրանսիական իշխանությունները կողմից խմբագրակազմը մի քանի անգամ զգուշացվել է, որ նման ծաղրանկարներ հրապարակելը կարող է ծանր հետևանքներ ունենալ: Իսլամական աշխարհին քաջ ծանոթ էր երգիծաթերթի վարած քաղաքականությունը, նրա թիրախը: Այնուհանդերձ տեղի ունեցած այս արյունալի ողբերգությունը այլևս անշրջելի փաստ է և տվյալ պահին ոչ ոք չի կարող ասել, թե դրա հետևանքները մինչև ո՞ւր են հասնելու: Երկրում կրոնական փոխադարձ ատելություն է զգացվում: Հայտնվում են երգիծանկարիչներ, որոնք սադրիչ կոչեր են անում շարունակել հրապարակել Մուհամմեդ մարգարեի ծաղրանկարները: Կան մարդիկ, ովքեր թվիթերում հայտարարում են, որ պատրաստ են հանուն խոսքի ազատության մարտիրոսել իրենց կյանքը: Լարվածություն գնալով ավելանում է: Կիրակի օրը Ֆրանսիայի քաղաքներում բողոքի ցույցեր են լինելու: Ըստ MTV կայանի Փարիզի բողոքի մեծ ցույցին մասնակցելու են նաև` Գերմանիայի կանցլեր Անգելա Մերկելը, Մեծ Բրիտանիայի վարչապետ Դևիդ Քեմերոնը, և Ֆրանսիայում գործող կուսակցությունները:
Այսպիսով ներկա պահին ոչնչացված են Փարիզի տպարաններից մեկում մարդկանց պատանդ վերցրած ակաբեկչության գլխավոր գործող անձինք: Կասկածելի հանգամանքներում ինքնասպան է եղել «Շառլ Էբդոյի» գործով քննիչը: Նախագահ Օլանդը արտակարգ խորհրդակցություն է հրավիրել: Ստեղծված իրադրությունում ֆրանսիական իշխանությունների կողմից կայացրած յուրաքանչյուր սխալ որոշում ողջ երկրի համար կարող է պայթյունավտանգ լինել: Ցավալիորեն հազարավոր մարդիկ իսլամն ու ահաբեկչությունը նույնականացնում են և դրանով ավելի սրում իրավիճակը: Ոմանք արդեն խոսում են Ֆրանսիայում քաղաքացիական պատերազմի հավանականության մասին:
Ժամերի ընթացքում «Շառլ Էբդոյի» ողբերգական դեպքը Եվրոպայում արդեն իսկ շատ բան է փոխել և սրանից հետո հին մայրցամաքում նոր վերակենցաղությունը գլխավոր դերակատարներից մեկն է լինելու:
Արամ ՊԱՉՅԱՆ
Կարծիքներ