Ինչ կապ ունի Լեո Նիկոլյանը Անդրիուս Պուլոկասի հետ

Քիչ առաջ ՄԻՊ գրասենյակից հաղորդագրություն ստացանք. «Պաշտպանի հանձնարարությամբ ՄԻՊ ներկայացուցիչներն այցելել են Լեո Նիկոլյանին» վերտառությամբ: Կարդացինք այդ հաղորդագրությունը.

«Մարդու իրավունքների պաշտպան Անահիտ Մանասյանի հանձնարարությամբ ՄԻՊ ներկայացուցիչները, այդ թվում՝ աշխատակազմի բժիշկ-մասնագետը, մայիսի 21-ին հերթական այցն են իրականացրել «Զվարթնոց» օդանավակայան՝ ֆրանսահայ լրագրող Լեո Նիկոլյանին տեսակցելու և նրա առողջական վիճակին տեղում ծանոթանալու նպատակով: Լեո Նիկոլյանի առողջական վիճակին վերաբերելի հարցերը ՄԻՊ ներկայացուցիչները քննարկել են օդանավակայանի բժշկական ծառայության ներկայացուցչի հետ: Հանդիպման ավարտին դեսպան Անդրիուս Պուլոկասին շնորհակալություն է հայտնել ընդունելության համար և կարևորել Պաշտպանի հաստատության դերը մարդու իրավունքների պաշտպանության բարձր առաքելության իրականացման գործում»։

Ովքեր չնկատեցին, ասենք` հաղորդագրության վերեւում օդանավակայանում հացադուլ եւ բողոքի ակցիա անող Լեո Նիկոլյանի մասին է գրված, ում մուտքն արգելել են Երեւան եւ նա օդանավակայանում արդեն տասն օրից ավելի ակցիա է անում եւ ում այցելել են ՄԻՊ ներկայացուցիչները: 

Իսկ հաղորդագրության վերջին տողում ինչ որ դեսպան` Անդրիուս Պուլոկաս անունով, ինչ որ հանդիպումից հետո շնորհակալություն է հայտնում ՄԻՊ-ին եւ կարեւորում նրա դերը: Հարց է ծագում` Նիկոլյանն ու Անդրիուս Պուլոկասն ի՞նչ կապ ունեն միմյանց հետ` ոչ մի կապ: Պուլոկասը Լիտվայի հանրապետության դեսպանն է Հայաստանում:

Հավանաբար երկու տարբեր հաղորդագրություններ իրար են կպցրել ՄԻՊ գրասենյակում եւ ուղարկել լրատվամիջոցներին: 

Նկատենք, որ ՄԻՊ գրասենյակն ահռելի աշխատակազմ ունի եւ բյուջեից միլիոններ է ստանում եւ կարող են գոնե շաբաթը 2-3 հաղորդագրությունների վրա նորմալ աշխատել եւ գրագետ կազմել: Իսկ կազմելուց հետո, ուղարկելուց առաջ իրենց նեղություն տալ եւ մի հատ գոնե կարդալ։

Արեգ Մարգարյան