Թուրքիան Ավստրիայի խորհրդարանի որոշումը դատապարտող հայտարարություն է տարածել
Թուրքիայի արտգործնախարարությունն Ավստրիայի խորհրդարանի կողմից Հայոց ցեղասպանության վերաբերյալ բանաձևի ընդունումը դատապարտող հայտարարությամբ է հանդես եկել, գրում է Zete կայքը։
Արտաքին քաղաքական գերատեսչությունը հայտարարել է, թե Ավստրիայի խորհրդարանը, իրավական ու պատմական իրողություններին հակադրվելով, թուրք ազգին մեղադրանք ներկայացնելու իրավունք և գործառույթ չունի:
«Թուրքիան և թուրք ազգն իր պատմության հանդեպ այդ զրպարտանքը չի մոռանալու»,- ասել են ԱԳՆ-ից՝ պնդելով, թե Առաջին համաշխարհային պատերազմի ժամանակ բոլորը նույն պայմաններում են կռվել, և տեղի ունեցած մեծ ողբերգությունը «ցեղասպանություն» բնութագրելը սխալ է:
«Բոլոր քրիստոնյա խմբերի ցավերը կիսելով՝ այդ ընթացքում զոհված մուսուլմաններին որևէ կերպ չանդրադառնալը ցույց է տալիս կրոնական հիմքով դրված խտրականութունը»,-ասված է հայտարարության մեջ:
Դրանում նաև նշվում է, որ Ավստրիայի խորհրդարանը պատմության դաս տալու իրավունք չունի, և իրենք դատապարտում են այդ նախաձեռնությունը:
Հիշեցնենք, որ երեկ Թուրքիան ի նշան բողոքի հետ է կանչել Ավստրիայում իր դեսպանին:
Կարծիքներ