Պետք է կառավարման խորհուրդ ստեղծվի, որտեղ ներառված կլինեն բոլոր ազգային ուժերը
«Հրապարակի» զրուցակիցը «Հայաքվե» նախաձեռնության անդամ, իրավաբան Արամ Պետրոսյանն է:
- Վերջին դեպքերի հետ կապված ձեր նախաձեռնությունն էլ է որոշակիորեն ակտիվացել` փողոցներ եք փակում: Ի՞նչ ծրագրեր ունեք առաջիկայում:
- Այսօր մեծ խորհրդի նիստ ենք հրավիրել: Այդտեղ որոշումներ կկայացնենք: Այո, ինչպես տեսաք, մենք շարժում սկսեցինք:
- Ովքե՞ր են որոշումներ կայացնողները:
- Մեր նիստն է, որում ներգրավված են մի շարք մարդիկ, ՀԿ-ներ, խոսքը մի քանի տասնյակ մարդու մասին է:
- Ինչպե՞ս եք ելքը տեսնում այս իրավիճակից:
- Անհատապես տեսնում եմ այն, որ սա րոպե առաջ պետք է հրաժարական տա: Ինչքան սա մնա, Հայաստանն այդքան վտանգի տակ է մնալու: Հայաստան չի լինելու, եթե սա մնաց: Կոչ ենք անում քաղաքական ուժերի կոնսոլիդացիա և այլն:
- Վերջին օրերին` ի աջակցություն Տավուշի տարբեր ապակենտրոն նախաձեռնություններ են ձևավորվում, ակցիաներ են տեղի ունենում, նաեւ` հանպատրաստից: Կան տեսակետներ, որ հին դեմքերը, պառլամենտական ընդդիմությունն, օրինակ, իր ներկայությամբ խանգարում է, սակայն կա նաև կարծիք, որ անհայտ, նորաթուխ շարժումներն առավել քան անարդյունավետ են:
- Ես այն կարծիքին չեմ, որ ընդդիմադիրները խանգարում են, բայց ամեն դեպքում լսել եմ այդ կարծիքները: Մենք այսօր դատապարտված ենք միասնական լինելու: Այլ տարբերակ չկա:
- Նշում եք, որ կոնսոլիդացվել է պետք` ո՞ւմ շուրջ:
- Մեկ անձի խնդիր չկա: Իմ կարծիքով` այն պետք է կառավարման խորհրդի տեսքով լինի: Պետք է ընդհանուր որոշում կայացվի, որտեղ ներառված կլինեն բոլոր ազգային ուժերը:
- Ո՞ւմ նկատի ունեք ազգային ուժ ասելով, ՔՊ-ն էլ է իրեն ազգային ուժ համարում:
- Մեկ անձով Հայաստանը փրկել չի լինի: Այո, ես համոզված եմ, որ Նիկոլ Փաշինյանն էլ է իրեն ազգային ուժ համարում, բայց թե որ ազգի ազգային ուժը, այ դա է խնդիրը: Մի քանի օր առաջ ԱՄՆ-ում տեսանք, թե որ ազգի….
- Դաշնակցություն, ՀՀԿ, «Հայաստան» դաշնիք` նրանց համարո՞ւմ եք ազգային ուժ:
- Կարծում եմ` բոլոր նրանք, ովքեր պաշտոնապես հայտարարում են, որ Նիկոլին դեմ են, պետք է նրանց շուրջ համախմբվել:
- Ինչպե՞ս եք պայքարը պատկերացնում. փողոցային պայքար, նոր արտահերթ ընտրություններ…. ո՞րն է առավել իրատեսական տարբերակը:
- Սահմանադրական ճանապարհով պետք է լինի: Պետք է Փաշինյանի նկատմամբ անվստահություն հայտնեն ու նա հրաժարական տա:
- Բայց խորհրդարանական ընդդիմությունը փոքրամասնություն է: Ինչպե՞ս:
- 2018 թվականին էլ էր ընդդիմությունը փոքրամասնություն, բայց ճնշման տակ, սահմանադրական ճանապարհով արեց այն, ինչ իրեն հարկավոր էր:
- Այո, այն ժամանակ կար հանրային ճնշում` ինչպես նշեցիք: Այժմ Եկեղեցու դերն է մեծացել: Բագրատ Սրբազանն է փորձում համախմբել հանրությանը:
- Միանշանակ է, որ շարժման առաջնորդը` Բագրատ Սրբազանն է: Ես վաղուց եմ նրան ճանաչում և իր հանդեպ բացարձակ վստահություն ունեմ: Կարծում եմ` այդ շարժումն իր նպատակին հասնելու է:
- Այդ դեպքում ինչո՞ւ հենց նրա և եկեղեցու շուրջ չկոնսոլիդացվել:
- Մենք բոլորին կոչ ենք անում կոնսոլիդացվել Բագրատ Սրբազանի շուրջ: Սա միայն Տավուշի խնդիրը չէ, սա Հայաստանի Հանրապետության լինել չլինելու հարցն է:
- Իսկ ի՞նչ եք կարծում` հայ ժողովուրդը կկոնսոլիդացվի սրբազանի շուրջ, թե՞ քաղաքական առաջնորդ է հարկավոր:
- Սովորաբար միշտ եկեղեցին է կանգնել հայ ժողովրդի կողքին: Այս պահին եկեղեցու դերակատարումն այն պետք է լինի, որ հայ հանրությունը միաբան լինի, բայց եկեղեցին չի կարող լինել քաղաքական: Ինչ մնում է միասնությանը, ապա միասնության առումով ավելի լավ տարբերակ, քան եկեղեցին է, չկա:
- Բայց արդյո՞ք հայրենիքի փրկության հարցը քաղաքական հարց է:
- Երկիրը որպեսզի փորձենք պահպանել, որպեսզի գոնե մի բան մնա երկրից, պետք է քաղաքական լուծումներ տրվեն:
Կարծիքներ