Միակ փաստն այն է, որ Միհրանը գոյություն ունի, թեև դա էլ քննությունից հետո...

Է՜, ժամանակ կար, որ առյուծ էր ԴԱՀԿ Միհրանը, առյու՜ծ և պատկերացնել, որ նրա գործունեության մասին պիտի խոսի Արփինե Հովհաննիսյանը, ոչ միայն անհավատալի, այլ զավեշտի հասնող ծիծաղելի կթվար:

Բայց տեսեք որ այսօր ԱԺ-կառավարություն հարցուպատասխանի ժամանակ Լևոն Զուրաբյանը հետաքրքրվեց ԴԱՀԿ արդեն նախկին ծառայության պետ Միհրան Պողոսյանի՝ Պանամայի օֆշորներում գրանցված 3 ընկերությունների մասին: Նա հարցրեց կառավարությանը՝ ուսումնասիրե՞լ եք այդ փաստաթղթերը եւ հանգե՞լ եք եզրակացության:

Ու գիտե՞ք ով է պատասխանում: Արդարադատության նախարար Արփինե Հովհաննիսյանը:

Ժամանակները փոխվել են:

Ու գիտե՞ք ինչպես է պատասխանում: Ընդամենը լսեք.

«Ով էր ճիշտ, ով էր սխալ՝ գնահատականներ հնչեցնել, կարծում եմ, ավելի ճիշտ կլինի պնդումներ անել, երբ ավարտվի քննությունը այդ գործով: Կան փաստեր եւ այդ փաստերի հետ վերաբերվում են այնպես, ինչպես պետք է վերաբերվեն: Իսկ այս պահին փաստն այն է, որ պաշտոնատար անձը հրաժարական է ներկայացրել եւ իր հրաժարականի մեջ հիմնավոր կերպ ներկայացվել են պատճառները, որոնք դրվել են հրաժարականի հիմքում»:

Անորոշության և ոչինչ չասող բառերի մի խուրձ:

Գուցե ավելի լավ լիներ ասեր՝ միակ փաստն այն է, որ Միհրանը գոյություն ունի, թեև դա էլ քննությունից հետո...

Հասմիկ Բաբաջանյան