Այդ փաստերը վկայում են, որ Ադրբեջանի հիմնական նպատակն այլ է․ Փաշինյան

Հայաստանում ԼՂ բազմաթիվ բնակիչներ կան, որոնք չեն կարող վերադառնալ Լեռնային Ղարաբաղ։ Նրանցից շուրջ 5 հազարն այստեղ են նախորդ տարվա դեկտեմբերից ի վեր Լաչինի միջանցքի փակ լինելու հետևանքով, ևս շուրջ 30 հազարը՝ 2020 թվականի նոյեմբերի 9-ի եռակողմ հայտարարության 7-րդ կետի չկատարման հետևանքով։

Հիշեցնեմ, որ 2020 թվականի նոյեմբերի 9-ի եռակողմ հայտարարության 7-րդ կետն ազդարարում է՝ ներքին տեղահանված անձինք և փախստականները վերադառնում են Լեռնային Ղարաբաղի տարածք և հարակից շրջաններ՝ ՄԱԿ-ի փախստականների հարցերով գերագույն հանձնակատարի գրասենյակի վերահսկողության ներքո։ Այս մասին քիչ առաջ կառավարության հերթական նիստին հայտարարեց վարչապետ Նիկոլ Փաշինյանը։

«Այս դրույթի չկատարումը և մյուս փաստերը շարունակաբար վկայում են, որ Ադրբեջանի հիմնական նպատակը ԼՂ հայության էթնիկ զտման ճանապարհով հայությանը Ղարաբաղից հեռացնելն է»,- հավելեց նա։