«Վանդալիզմ է, մենք Նախիջեւանի հուշարձանների համար կսեինք, իսկ մերը…»

Այսօր Գյումրու քաղաքապետարանում կայացած ավագանու նիստի ժամանակ քննարկվեց նաեւ Շիրակի երկրագիտական թանգարանին նոր շենքային պայմաններ տրամադրելու վերաբերյալ վարչապետին ուղերձ հղելու հարցը: Նախաձեռնողն ավագանու անդամ Լեւոն Բարսեղյանն էր: Այս հարցի վերաբերյալ Լ.Բարսեղյանն ասաց, որ 1830-ականներից մենք ունենք Շիրակի երկրագիտական թանգարան, որն ունի բացառիկ ցուցանմուշների հավաքածու: Թանգարանն ըստ  Լ.Բասեղյանի վերածվել է պահեստի եւ ցուցանմուշները ցուցադրելու տեղ չկա: Դրանց թիվն անընդհատ ավելանում է, քանի որ թանգարանի աշխատողներն ակտիվ պեղումների մեջ են:



 



«Հազար ներողություն, քոչվորի նման մի շենքից մյուս շենքն են գնում: 1988 թվականից մի հարկանի փոքր  շենքում է այդ ամբողջը տեղավորված:  Գիտենք, որ  նոր հիվանդանոց կառուցելու եւ շահագործման հանձնելու  արդյունքում  մի քանի շենքեր են ազատվել քաղաքում:  Թանգարանն էլ է պետական, Գյուլբենկյանի շենքն էլ: Առաջարկում եմ ընդունենք ուղերձ  ուղղված վարչապետին եւ կոչ անենք Գյուլբենկյանի շենքի մի կամ մեծ մասը հատկացնել թանգարանին եւ քաղաքում մի գործող թանգարան ավել կունենանք»:  Լ.Բարսեղյանի դիտարկումներին համաձայնեց   քաղաքապետ Սամվել Բալասանյանը: Այնուհետեւ քննարկվեց  Մյուս կարեւոր   հարցը  Գյումրու առաջին գերեզմանոցի հուշարձանների իրադրությունը պարզելու  եւ այլ միջոցառումների իրականացման համար ավագանու ժամանակավոր հանձնաժողով կազմելու եւ հանձնաժողովին հանձնարարություններ տալու  մասին հարցը:



 



Քանի որ օրենքով գերեզմանատներում ՏԻՄ-ը   լիազորություններ ունի ուսումնասիրություններ կատարելու,  Լ.Բսրսեղյանը պնդեց, որ Գյումու  թիվ առաջին գերեզմանատանը ուսումնասիրություններ կատարելու անհրաժեշտություն կա: Իրեն  նամակով դիմել է պատմական միջավայրի պահպանության Շիրակի մարզային կառույցի տնօրեն Ավետիք Մելիք-Սարգսյանը, որում նշված է, որ համանման նամակով նաեւ  քաղաքապետին է դիմել: Նա իր  մտահոգություններն է հայտնել   առաջին գերեզմանոցում տիրող կացության շուրջ:



 



«Առաջին գերեզմանատանը հին քարեր են ջարդվում, կոտրվում: Այս մասին նաեւ լուսանկարներ կան արված: Առաջարկում եմ ավագանու հանձնաժողովներից մեկին, որը գիտության, կրթության, երիտասարդության եւ սպորտի հարցերով է զբավում, ենթահանձնաժողովի նման մարմին ձեւավորի  իր կազմից, ներգրավելով հուշարձանների մասնագետների: Ենթադրաբար 3 ամսվա ընթացքում ուսումնասիրի, պարզի, թե ինչ իրավիճակ է այդ գերեզմանոցում, թե որքանով են իրականությանը համապատասխանում նամակում բերված մտահոգությունները: Ինչպիսին է տեղի ունեցած ավերածությունները, եթե այդպիսիք կան»: Ավագանու անդամն ասաց, որ իր առաջարկությունն աննախադեպ է եւ պետք է պարզել առաջին գերեզմանոցում վտանգված գերեզմանների քանակը: Նաեւ դրանք վնասվածության եւ ոչնչացման սահմանները: «Պետք է սահմանել գերեզմանատան տարածքում թաղված նշանավոր մարդկանց  գերեզմաների մոտ տեղադրվելիք հատուկ ցուցանակների ցնակը եւ կատարված աշխատանքների մասին զեկուցել ավագանուն»: Ավագանու անդամի ելույթից հետո ներկաներից մեկն  ասաց.«Վանդալիզմ է, մենք Նախիջեւանի հուշարձանների համար կսեինք, իսկ մերը…»:



 



Համաձայնելով Լ.Բարսեղյանի առաջարկին, քաղաքապետն ասած, որ Գյուրջիեվի հիմնադրամից իրենք ստացել են նամակ, որտեղ  նշված է գերեզմանատանը կատարված խեղաթյուրումների մասին:



 



«Հավերժ հիշատակի» գերեզմանոցի տնօրենը եւս համաձայնեց  առաջարկի հետ: Նա պնդեց, որ մարդը,  100 տարվա գերեզմանը քանդում է, կնոջ համար տեղ ազատելու համար, ասելով, որ դա իրենն է: Ս.Բալասանյանն էլ ավելացրեց, որ եթե մարդն ուզենա շարժվել գերեզմանոցով, քարերի վրա թռչելով պետք է շարժվի: Քարտեզագրում էլ չկա: «Ես երբ նոր էի քաղաքապետ դարձել, մի հատ բողոք ստացանք, որ ինչ-որ մեկի գերեզմանոցը վերցրել են, կառուցապատել եւ ուրիշ մարդ թաղել, ինչը չէր կարելի:  Ուշադիր պետք է լինել, որ Էդպիսի բաներ չկրկնվեն: Նույնիսկ ավելի շուտ պետք է սկսել գերեզմանատանն ուսումնասիրման աշխատանքները: «Եթե պետք է, մենք լրացուցիչ գումարներ կտանք քարտեզագրման աշխատանքների համար»:



 



Վերջում նշեմ, որ  ավագանու նիստին քննարկվեց 11 հիմնական եւ 8 լրացուցիչ հարց:  Իսկ ամենակարեւոր հարցերից մեկը, որ վերաբերվում էր Շիրակի մարզպետարանի Գյումրու քաղաքապետարանում իրականացված վարչական ստուգումներին, քննարկեց լրացուցիչ հարցերի շրջանակներում եւ ոչ գլխավոր հարցերի:  Թեմայի շուրջ զեկուցող Ա.Բալաբեկյանն ասաց, որ մարզպետարանի Գյումրու քաղաքապետարանում իրականացված վարչական հսկողության ակտը պետք է ներկայացվեր ավագանու քննարկմանը: «Ակտում ներառնված առաջին կետերից մեկն այն է,որ նախկին վարչական հսկողության ակտը չի ներկայացվել համայնքի ավագանու քննրկմանը եւ դա ֆիքսվել է, որպես թերություն: Հիմա մենք ներկայացնում ենք այդ ակտը»: Նշեմ, որ ԶԼՄ ներկայացուցիչներին այնքան էլ հասկանալի չէ, թե ինչի մասին է խոսքը, ուստի լրագրողներից մեկը հարցրեց, թե ինչի մասին է խոսքը: Ս.Բալասանյանը հորդորեց  այն լրագրողներին, ովքեր հարցեր ունեն տալու պարոն Բալաբեկյանին, հետո դա անեն:



 



Նշեմ, որ ըստ 2012 թվականի նոյեմբերի 28-ին կազմված ակտի,  համայնքի  բյուջեի կատարման հարցում թերացումներ են նկատվել, երբ բյուջեով նախատեսված եկամուտների դիմաց փաստացի  մուտքը քիչ է եղել:  Նաեւ նշված է, որ 2011 թվականի դեկտեմբերի 20-ի որոշմամբ ավագանին համաձայնել է համայնքի կարիքների համար տեխնիկա ձեռք բերելու նպատակով «Յունիբանկ» ՓԲԸ-ից  8490.0 հազար դրամ վարկ վերցնելու վերաբերյալ եւ համապատասխան նշումներ չի կատարել վարկ ստանալու վերաբերյալ  պետական լիոզորված մարմնի համաձայնության կամ նրան դիմելու վերաբերյալ: Մարզպետարանի քաղաքապետարանում  իրականացված ստուգումների վերաբերյալ ակտում քաղաքապետարանի աշխատանքի բազմաթիվ ոլորտներում թերացումներ են հայտնաբերվել:



 



Հավելեմ, որ նիստի ժամանակ քննարկվող լրացուցիչ հարցերից էր նաեւ համայնքի սեփականություն հանդիսացող հենասյուների վրա մալուխների ամրակցման մեկ կետի վարձույթի չափ սահմանելու մասին հարցը: Ավագանին որոշեց  Հայաստանյաց Առաքելական  Սուրբ եկեղեցուն տարածք նվիրաբերել Գյումրու Աբովյան փողոցի N 252 հասցեի շինությունից:



 



Անահիտ ՍԻՄՈՆՅԱՆ