Դիմավորեցին Եվրոպայի չեմպիոն Լևոն Աղասյանին

Այսօր «Զվարթնոց» օդանավակայանում տեղի ունեցավ Իտալական Ռիետե քաղաքում տեղի ունեցած աթլետիկայի Եվրոպայի պատանեկան առաջնությունում հեռացատկի մրցումներում ոսկե մեդալ նվաճած Լևոն Աղասյանի դիմավորման արարողությունը: Օդանավակայան էին եկել Աղասյանի ծնողները և  հարազատները,  Սպորտի և երիտասարդության հարցերի նախարարության ներկայացուցիչները փոխնախարար Նազարեթ Մնացականյանի գլխավորությամբ, բազմաթիվ մարզիկներ և մարզասերներ: Նազարեթ Մնացականյանը պատվո պսակը հանձնելով Աղասյանին ասաց, որ նվաճված ոսկին առանձնահատուկ է նաև նրանով, որ  անկախ Հայաստանի պատմության մեջ այն առաջինն է, ինչը  հպարտություն և ոգևորություն է առաջացնում  յուրաքանչյուր մարզասերի, հայ մարդու մոտ: "Համոզված եմ, որ Լևոնը չի բավարարվի ձեռք բերածով, և մենք առաջիկայում առիթ կունենանք նշելու նրա ավելի մեծ հաջողությունները, իսկ պետությունն էլ հանձինս Սպորտի և երիտասարդության հարցերի նախարարության պատրաստ է ամեն կերպ աջակցել նրան նորանոր հաղթանակների հասնելու գործում",-հայտարարեց Նազարեթ Մնացականյանը: