Մենք կույր ընդդիմություն չենք, որ լավ բան անեն, դեմ քվեարկենք

ԲՀԿ-ում խմորումները շարունակվում են, ԲՀԿ խմբակցության գործարար պատգամավոր Աբրահամ Մանուկյանը, որը պատերազմ էր հայտարարել ԲՀԿ նախագահ Նաիրա Զոհրաբյանին, երեկ զրկվել է իր լծակներից։ ԲՀԿ խոսնակի տեղեկացմամբ, Նաիրա Զոհրաբյանի եւ Աբրահամ Մանուկյանի խոսակցությունից հետո որոշում է կայացվել, որ վերջինս չի զբաղվելու ԲՀԿ տարածքային կառույցների համակարգմամբ, այլ զբաղվելու է միայն Շենգավիթի եւ Նորք-Մարաշի ԲՀԿ կառույցներով։ Նախկինում Մանուկյանը համակարգում էր ԲՀԿ 68 տարածքային կառույցներից 44-ը, մյուսները համակարգում էր Վարդան Վարդանյանը։ Սակայն լուրեր կան, որ Մանուկյանը կշարունակի իր միսիան ավարտին հասցնել ու ԲՀԿ-ն դուրս բերել Նաիրա Զոհրաբյանի «տակից», որը, ըստ այդ թեւի, հստակ քաղաքական գիծ չունի եւ կեղծ ընդդիմադիր է խաղում։ Ի դեպ, նախկին մամլո խոսնակ Վահան Բաբայանը նույնպես նման կարծիք էր հայտնել, որ եթե ԲՀԿ-ն քաղաքական գիծ ունենար, ինքը չէր լքի։ 

Փետրվարյան իրադարձություններից հետո նավն առաջինը լքած, բայց կրկին ետ վերադարձած Արայիկ Աղաբաբյանն ասում է, որ ԲՀԿ-ում խժդժություններ չկան, ու կուսակցությունն էլ չեն լքում։ «Վահան Բաբայանինը լքել չէր, նա ուղղակի դուրս եկավ»,- վրդդովված տոնով մեզ «ուղղեց» ԲՀԿ-ականը։ Նա չգիտի, թե ով եւ ինչու է խժդժություններ հրահրում ԲՀԿ-ում. «Առաջին անգամ եմ նման բան լսում», իսկ ԲՀԿ-ից դուրս գալու պատճառների մասին հորդորում է ճշտել դուրս եկողներից։ Արշակ Մխիթարյանը՝ Բռլյանտի Արշակն էլ «բեխաբար» էր կուսակցությունից։ «Ո՞վ է լքել, մա՞րդ է լքել»,- մեզնից էր ճշտում նա. «Ես ոչնչից տեղյակ չեմ»։ Վահագն Մախսուդյանն էլ կուսակցությունում խմորումներ չի տեսնում. «Եթե Վահան Բաբայանի դուրս գալն է, ապա Վահան Բաբայանը քանի՜ կուսակցություն է փոխել, էստեղ էլ փոխեց, էլի, սովորության համաձայն»։ Թե ինչու էին ԲՀԿ-ում կուսակցափոխին առանցքային դերակատարում վերապահել, Մախսուդյանը չցանկացավ պատասխանել. «Մի ժամանակ մեզ միացավ, հիմա էլ դուրս եկավ»։

- Վահան Բաբայանը ԲՀԿ-ն լքելուց հետո ասաց, որ կուսակցությունը ներկայումս քաղաքական հստակ գիծ չուներ, ունենար՝ ինքը չէր լքի։

- Էդ ինքը չունի քաղաքական հստակ գիծ, որովհետեւ 4-5 կուսակցություն է փոխել։

- Դուք ասում եք՝ խմորումներ չկան, բայց կուսակցության ղեկավարն անգամ հայտարարում է, որ խմորումները հրահրում է գործարար պատգամավորներից մեկը։

- Ես չգիտեմ գործարար պատգամավորներից որ մեկն է հրահրում, բայց էն, ինչ կատարվում է, սովորական բան է։

- Իսկ Ձեզ չի՞ հետաքրքրում, թե ով է այդ «խառնակիչը» եւ ինչու է խմորումներ հրահրում։

- Ճիշտն ասած՝ կարող է լինի մեկը, մարդիկ տարբեր ազդեցությունների տակ են ընկնում։

- Ակնարկն Աբրահամ Մանուկյանին էր ուղղված։

- Ես չեմ կարող ասել, որ Աբրահամ Մանուկյանը նման բան է... ես Մանուկյանի հետ մոտիկ եմ, բայց հիմա Մոսկվայում է, ու ես իրեն չեմ տեսել, որ հարցնեի՝ Աբրահամ Մանուկյան, ինչի՞ ես սենց բան անում, կամ ի՞նչն է պատճառը։ Ես էսքան ժամանակ չեմ տեսել, որ Մանուկյանը խառնակչություն հրահրի, որ չեմ տեսել, ի՞նչ ասեմ։ Քննչական մարմիններում էլ կա նման բան, մարդկանց առանձին-առանձին լսում, հետո առերեսում են կատարում, որ հասկանան, թե ով է ճիշտ։ Քանի չենք տեսել, չենք լսել, խոսելը դժվար է։

- Վերջին շրջանում մամուլում հաճախ է տեղեկություն հայտնվում, որ ԲՀԿ-ում կա մի թեւ, որը ցանկանում է իշխանափոխություն իրականացնել, քանի որ ԲՀԿ ղեկավարը միանձնյա որոշումներ է կայացնում, կուսակցականների կարծիքը մեծ մասամբ հաշվի չի առնում եւ չի որդեգրում հստակ քաղաքական գիծ՝ մեկ ընդդիմություն է, մեկ իշխանության հետ է համագործակցում։

- Կուսակցության ղեկավարը պարկեշտ, մաքուր, ազնիվ, պատրաստված մարդ է, ու ես դրա անհրաժեշտությունը չեմ տեսնում։

- Նախկին սոցապնախարար Գեւորգ Պետրոսյանն էլ ճամբարափոխ չէր, բայց վերջերս աղմկահարույց հայտարարություններ արեց՝ խոսելով կուսակցության ոչ հստակ գծի, միանձնյա որոշումների ու էլի նման բաների մասին, որից հետո հեռացրին կուսակցությունից։

- Նա սահմանադրական գործընթացից առաջ որպես իրավաբան եկավ, որոշումներ բացատրեց ու անհետացավ, բայց թե նրանից հետո ինչ է կատարվել, ինչ չի կատարվել, ես չգիտեմ։

- Այդ ո՞նց է ստացվում, որ շարքային կուսակցականը չգիտի, թե ինչու է հեռացվում իր թիմակիցը, մինչդեռ կուսակցության ղեկավարությունը հայտարարում է, թե ԲՀԿ-ն ինքնամաքրվում է։

- Ամեն մարդ, ինչ-որ կուսակցության մեջ մտնելով, որոշակի ակնկալիքներ ունի, քաղաքական պաշտոններ եւ այլն, մենք էսօր չենք կարող դրանց բոլորի հարցը լսել։ Կոնկրետ Գեւորգ Պետրոսյանին ճանաչում եմ, նորմալ մարդ է։

- Վահան Բաբայանի դեպքում ասում էին, թե իշխանության հետ կոալիցիայի կողմնակից է, իսկ Գեւորգ Պետրոսյանը կոնկրետ ի՞նչ խնդիրներ է մատնանշել։ Խնդիրն արդյոք ԲՀԿ-ում չէ՞։

- Ես ոչ էքստրասենս եմ, ոչ բախտագուշակ, որ ասեմ ինչի այդպես եղավ, ես չեմ խոսել նրա հետ, եթե տեսնեմ, կհարցնեմ՝ Գեւորգ ջան, դու նորմալ մարդ, ինչի՞ այդպես եղավ, ի՞նչ լուրջ բան է եղել, եթե մի թեթեւ բանից պիտի կուսակցություն փոխես, ուրեմն դու հաստատ հարյուր կուսակցություն կփոխես։

- Պարոն Մախսուդյան, ԲՀԿ-ն ոչ վաղ անցյալում աջակցեց Սերժ Սարգսյանի նախաձեռնած սահմանադրական փոփոխություններին, կողմ քվեարկեց կառավարության բյուջեին, այլ նախագծերի, ծափահարում էր իշխանական ելույթները, խնդրում, որ իր հետ կոալիցիա կազմեն, իսկ հիմա պնդում եք, թե ընդդիմադիր եղել եք ու մնում եք։ Գուցե սկզբունքային մարդկանց այս հաճախակի փոփոխությունները դուր չե՞ն գալիս։

- Մենք կառուցողական ընդդիմություն ենք․ որը ժողովրդի համար լավ է արվում, կողմ ենք, վատ է արվում՝ դեմ։ Մենք կույր ընդդիմություն չենք, որ լավ բան անեն, դեմ քվեարկենք։

- Նոր Սահմանադրության մասին գրեթե բոլորն էին դեմ խոսում, մինչդեռ ԲՀԿ-ն կողմ եղավ։

- Բյուջեին կողմ եղանք, որովհետեւ կառավարությունը վերջապես պրիզնատ եկավ, որ բան չունի, սրանից ավել չի կարող ներկայացնել։ Իսկ Սահմանադրությանը ես ներկա չեմ եղել։

- Բայց ԲՀԿ-ն այնպես է աջակցել, որ մինչեւ հիմա քրգործեր են քննվում ԲՀԿ-ական հանձնաժողովականների դեմ, որոնք հանուն «այո»-ի կեղծիքներ են թույլ տվել։

- Հնարավոր է։ Բայց դու արդեն 5 տարի ես վերլուծում, փետրվարից հետո կուսակցության մեջ ահագին բաներ եղան։

- Համաձա՞յն եք, որ հստակ քաղաքական գծի բացակայության պատճառով է կուսակցությունը կազմաքանդվում։

- Էսօրվա դրությամբ մենք ընդդիմադիր ենք, իսկ նախկինում կողմ ենք քվեարկել այն բաներին, որը ժողովրդի համար լավ է եղել։ Ես համոզված եմ՝ կուսակցությունը կամրանա, կմաքրվի, շատ լքողներ չեն լինի։