Զարուհի Բաթոյանը չի կանչվել բացատրություն կամ ցուցմունք տալու
Մամուլը հայտնել էր, որ ՀՀ կառավարության 2019 թ․ որոշման հիման վրա՝ պաշտպանված բնակարաններ եւ փոքր տներ ձեռք բերելու նպատակով սոցապնախարարությանը հատկացվել է գումար, հայտարարվել մրցույթ, որի արդյունքում կոնկրետ ընկերություն է հաղթել, սակայն գումարները հետագայում անհայտ ուղղությամբ են գնացել: Մինչ աշխատանքի եւ սոցիալական հարցերի նախարարությունը պետք է տարեցների համար պաշտպանված տներ ձեռք բերելու գործընթացը կազմակերպեր, իրավապահները ստուգումներ են իրականացրել եւ բացահայտել, որ նախարարության կողմից բնակարանները ձեռք են բերվել շուկայական արժեքից թանկ գներով:
Արդյունքում գործով կալանավորվել են նախարարության աշխատակիցներ եւ այս օրերին էլ գտնվում են կալանքի տակ: «Ժողովուրդ» օրաթերթին հասած լուրերի համաձայն՝ այս քրեական գործով ուշագրավն այն է, որ իրավապահները կալանավորվածներին ներքին կարգով ասում են՝ ցուցմունք տվեք նախարարի, փոխնախարարի դեմ, եւ դրանից հետո նոր խափանման միջոցը կփոխվի: Իսկ 2019 թվականին սոցապնախարար էր այժմ ՔՊ խմբակցության պատգամավոր Զարուհի Բաթոյանը: Մենք նրան հարց ուղղեցինք՝ կանչվե՞լ է այս գործով բացատրություն տալու։ «Ոչ»,- ասաց Զարուհի Բաթոյանը։ Իսկ ի՞նչ մեկնաբանություն ունի տարածված լուրերի վերաբերյալ։ «Չունեմ մեկնաբանություն»,-ասաց նա։ Իր պաշտոնավարման ժամանակ է կատարվել ենթադրյալ հանցագործությունը` յուրացումները, կարո՞ղ էր նախարարը բանից անտեղյակ լինել, իր ենթակաների գործունեությունը չվերահսկել։ Լավ, ի վերջո, կասկածներ չի՞ ունեցել, հարցեր չի՞ ունեցել։ «Իհարկե, չեմ ունեցել կասկածներ, իսկ թե կարող էին անել, թե ոչ, քննությունը, հուսով եմ, ցույց կտա»,- ասաց նախկին նախարարը։
Պաշտոնյաները, որոնք այժմ գտնվում են կալանքի տակ, ի՞ր կողմից են նշանավել, թե՞ նախկինների։ «Ոչ։ Կամ՝ հիմա չեմ կարող հիշել։ Այսինքն, պիտի որ՝ չէ»,- այս հարցին էլ այսպիսի պատասխան ստացանք։ Իսկ որ մեղադրյալներից պահանջվում է ցուցմունք տալ փոխնախարարի ու նախարարի դե՞մ։ «Չէ, չունեմ մեկնաբանություն»։ Զարուհի Բաթոյանը՝ ինքը, քննությանը հայտնելու որեւէ բան չունի՞։ Լռություն։
Զարուհի Բաթոյանը հայտնեց, որ այս ծրագիրը եղել է միջոցառում՝ ուղղված հաշմանդամություն ունեցող անձանց` ապաինստիտուցիոնալ անձանց, այսինքն, նրանց՝ հաստատություններից դուրս բերելուն եւ ընտանեկան միջավայրում ապրելուն ուղղված ծրագիր է եղել, որը հիմա էլ ընթանում է։
«Գնում էր, որի արդյունքում պետք է լիներ էդ ծրագիրը, այսինքն՝ անձանց տան վերանորոգում, տեղավորում եւ այլն։ Ծրագիրը, որպես էդպիսին, ուրիշ կոմպոնենտ չուներ եւ գնում է։ Հիմա խնդիրը, որքան գիտեմ, գնումների մեջ է եղել, գնման գործընթացի հետ կապված։ Եվ էդ ժամանակ ես, բնականաբար, որեւէ խնդրի մասին տեղյակ չեմ եղել»,- ասաց Բաթոյանը։ Ըստ նախկին սոցապնախարարի, նման հարցերով ստեղծվում է հանձնաժողով, որն իրականացնում է այդ աշխատանքները՝ օրենքին համապատասխան։ «Այսինքն՝ տեխնիկական մասերին ես տեղյակ չեմ»,- հայտարարեց պատգամավորը։
Նշենք, որ այս ծրագրով գնումների մրցույթներն իրականացվել են 2019-ի վերջին՝ նախաքովիդյան շրջանում։ Զարուհի Բաթոյանն անգամ հիշեց, որ 2019-ին ունեին խնայողություններ եւ այդ ընթացքում կառավարությունից ստացել են առաջարկ, որպեսզի գումարներ հատկացվեն հաշմանդամների տների ձեռքբերման համար։
Կարծիքներ