Իմքայլականի կարծիքով կարելի՞ է նաև ներկա պաշտոնյաների տարածքների վրա «դրոն իջեցնել», թե ոչ

ՀՀ նախկին ոստիկանապետ Վլադիմիր Գասպարյանը  «Pressing»  հաղորդաշարին տված հարցազրույցում ասաց, որ առաջին բանը, որ մտածեց իր գլխավերևում դրոն («Ազատություն» ռադիոկայանի) տեսնելով այն էր, որ ահաբեկչություն է, ապա առաջարկեց կարգավորել «դրոնների» մասով օրենսդրական դաշտը։ «Տեսալսողական մեդիայի մասին» օրենքի հեղինակ, իմքայլական պատգամավոր Վահագն Թևոսյանին  «Հրապարակը» հարց ուղղեց՝ այստեղ խնդիր տեսնու՞մ է, հետևաբար, օրենսդրական կարգավորման անհրաժեշտություն կա՞։ Իմքայլական պատգամավորի խոսքով՝ եթե վերացարկվենք կոնկրետ մարդու թեմայից,ապա առաջարկը  քննարկելի է։ «Պետք է հասկանալ՝ որքանով է անվտանգային խնդիր և որքանով է խոսքն անձնական տարածքի մասին։ Ամեն դեպքում, լուսանկարը, որ արվել էր, չեմ կարծում, որ անձնական տարածք ներխուժել էր․  «անձնական տարածք» հասկացությունը մի քիչ այլ հասկացություն է, ունեցվածքը լուսանկարելը՝ ուրիշ» ,-ասում է «Իմ քայլի»  պատգամավորը։ 

-Բայց չէ՞, որ թռչող սարքը մտել էր Գասպարյանի առանձնատան տարածք։

-Անձնական տարածքի մեջ էր մտել, այդ ունեցվածքը մենք պետք է տեսնենք թափանցիկ։ Թե նախկին պաշտոնյան ինչ է կառուցել և պետք է հասկանանք՝ ինչ միջոցներով։ Չեմ կարծում, որ նախկին պաշտոնյաների կառուցած միջավայրերը չպետք է լինեն թափանցիկ և չպետք է լինեն տեսանելի հանրության համար։

-Այսինքն․․․

-Այսինքն՝ սարքը չի մտել Գասպարյան Վովայի ննջասենյակ և դրոնը չի ֆիքսել , թե Գասպարյան Վովան իր ննջասենյակում ինչով է զբաղված։ Նկարահանվել է այն տարածքը, որը հանրային թափանցիկության անհրաժեշտություն ունի։

- Վլադիմիր Գասպարյանը պատմեց, որ դրոնը եկել, իր գլխավերևում է եղել, տզզացել է, անգամ մտածել է, որ ճանճ է, հետո նայել է վերև ու տեսնելով սարքը՝ սկզբում մտածել է, որ ահաբեկչություն է։

-Միշտ չէ, ավելի ճիշտ՝ հիմնականում, Գասպարյան Վովայի ասածներն ինձ համար հիմք չեն, որովհետև իրեն ամեն անգամ լսելիս՝ ես ամեն անգամ ահագին կեղծ բաներ եմ հայտնաբերում։

-Կեղծ կամ ոչ, բայց այնուամենայնիվ, նախկին, թե ներկա, մարդու իրավունքների խնդիր է։

-Այո, իհարկե։  Դրա համար եմ ասում՝ պետք է հասկանալ, թե որ  մասն է անվտանգության, որ մասը  անձնական կյանք միջամտելու, որ մասը՝ ուղղակի սեփականության ֆիքսման խնդիր, որը էսպես թե այնպես պետք է թափանցիկ լինի հանրության համար։ Իսկ եթե իր խնդիրն այն է, որ իր տարածքը նկարահանվել է, ապա կարծում եմ՝ բոլորն իրավունք ունեն իմանալու, թե նախկին պաշտոնյան ինչ կառույցներ ունի։Եվ այս կառույցները լուսանկարել է պետք։

-Իսկ ներկա պաշտոնյաների ունեցվածքի վրա կարո՞ղ են  «դրոն իջեցնել»։

-Կարծում եմ, որ․․․ ես ինքս, օրինակ, անհանգստանալու ոչ մի բան չունեմ, որովհետև ապրում եմ հինգհարկանի շենքի երկորրդ հարկում, կարող են հինգհարկանի շենքը վերևից նկարել և ասել, որ սրա երկրորդ հարկում երեք սենյականոց բնակարանում ապրում է Վահագն Թևոսյանը։

-Իսկ եթե իմքայլականներից ինչ-որ մեկը առանձնատուն է կառուցել, կարո՞ղ են այլ լրատվամիջոցներ, ոչ «Ազատությունը» դրոն ուղարկել։

-Կարելի է լուսանկարել կողքից, վերևից,այսետղ ես տարածք նկարելու էթիկական խնդիր չեմ տեսնում։ Էլի եմ ասում՝ այլ հարց է, որ կարող է լինել անվտանգության խնդիր։ Այսինքն՝ ներկա պաշտոնյայի տարածքի վրա, որտեղ ինքը գտնվում է, եթե դրոն է կախված, ապա՝ այդ դրոնը ո՞վ է ուղարկել, ինչի համար, ինչ է անում, արդյոք միայն լուսանկարահանում է, թե կարող  է նաև ինչ-որ մի բան գցի վերևից․․․․ դա այլ հարց է։ Իսկ նրանում, ինչ տեղի է ունեցել, էթիկական խնդիր չեմ տեսնում, էլի եմ ասում՝ էդ «դրոնը» չի մտել Գասպարյան Վովայի ննջարան։