«Գուգո, ամոթ ա, ամոթ... դեբիլ». լարված իրավիճակ Ազգային ժողովում (տեսանյութ)

Ազգային ժողովում Լաչինի միջանցքի թեմայով ընդդիմության կազմակերպած խորհրդարանական լսումների ժամանակ մթնոլորտը լարվեց, թեժացավ, երբ ելույթ ունեցավ լսումներին ներկա միակ ՔՊ-ական պատգամավոր Գուրգեն Արսենյանը:

Նա սկսեց հոխորտալից տոնով հաթաթա տալ ելույթ ունեցողների վրա, որոնք քննադատում էին իրենց իշխանությանը ստեղծված իրավիճակի համար:

Արսենյանը սկզբում տոնը բարձրացրեց` «ո՞վ եք դուք, արա, որ մեզ քննադատում եք», ապա կամաց-կամաց տոնը իջեցրեց, երբ տեղից նրա վրա սկսեցին բղավել ընդդիմադիրները:

Արսենյանի վրա հարձակվել ու գոռգոռում էին զինվորականներ, «Հայաստան» դաշինքի ներկայացուցիչներ, զոհված զինվորների ծնողներ: Բավականին ակտիվ էր նաև ՍԴ նախկին անդամ Կիմ Բալայանը, որը տեղից դիտողություն էր անում Արսենյանին: «Գուգո, ամոթ ա... դեբիլ»,- տեղից պոռթկած Բալայանը:

Արսենյանն ի վերջո տեղի տվեց ընդդիմադիրների ճնշանը, ելույթն ավարտեց, նրան մոտեցավ ՔՊ-ից մի կին, որը հավանաբար նրան հուշեց, որ չարժե այս լարված մթնոլորտում մնալ դահլիճում միայնակ, ու երկուսով դուրս եկան դահլիճից:

Նիստը վարող Սեյրան Օհանյանն էլ Արսենյանին հիշեցրեց, որ ինքը սադրեց իրավիճակը, ու իրենց իշխանությունը վաղը պատասխան է տալու ամեն ինչի համար:

Hraparak.am-ը հենց դահլիճից կարողացավ ֆիքսել իրավիճակը Արսենյանի ելույթի պահին:

Մանրամասն` տեսանյութում