Առաքիչները աշխատում են ծանրաբեռնված
Մենք տեղեկացանք, որ առաքման ոլորտի աշխատակիցները այս օրերին ծանրաբեռված են աշխատում։ Հիշեցնենք, որ վարչապետը ֆեյսբուքյան լայվերից մեկի ժամանակ անձամբ էր խորհուրդ տալիս մնալ տանը, և ինչ-որ բանի կարիքը զգալու դեպքում ոչ թե խանութ գնալ, այլ կատարել օնլայն գնումներ, որոնք տեղ են հասնում առաքման միջոցով։
«Հրապարակի» հետ զրույցում menu.am-ից չհերքեցին, որ առաքիչներն այս օրերին իրոք ծանրաբեռնված են աշխատում։ Վերոնշյալ ընկերության աշխատակիցը հայտնեց նույնիսկ, որ ստեղծված իրավիճակով պայմանավորված՝ այս օրերին սկսել են առաքման ոլորտի նոր աշխատողներ փնտրել։
Հարցին, թե որքան պետք է սպասի քաղաքացին պատվեր կատարելու դեպքում, «Մենյուի» ներկայացուցիչը պատասխանեց.« Դե դա կախված է հասցեի և սննդի կետի հեռավորությունից։ Միջին, ստանդարտ տևողությունը կարող եմ ասել, որն այս պահին 45-ից 50 րոպե է։
Աշխատակցը հավելեց, որ ընկերության բոլոր առաքիչները պատվերը տեղ հասցնելիս օգտվում են պաշտպանիչ բոլոր հնարավորություններից՝ դիմակ, ձեռնոց և այլն։
«ՍԱՍ» սուպերմարկետների ցանցից ևս նշեցին, որ իրենք առաքիչներն էլ աշխատում են ծանրաբեռնված։ Ըստ մեր զանգին պատասխանող աշխատակցի՝ «ՍԱՍ Ֆուդ Կորտից» ինչ-որ բան պատվիրելու դեպքում պետք է սպասել մոտավորապես 55 րոպե, իսկ խանութից պատվիրված ապրանքները՝ առաքիչների ծանրաբեռնված աշխատանքով պայմանավորված, մոտեցվում են 3 ժամվա ընթացքում։
«Այո, մենք ծանրաբեռնված ենք, դրա համար է այդպես»,- ասաց աշխատակիցները։
«Պարմայի» աշխատակցի խոսքով՝ իրենց առաքիչներն էլ են աշխատում ծանրաբեռնված։ Եվ եթե նախկինում, այսինքն՝ մինչեւ արտակարգ դրությունը և մարդկանց տեղաշարի սահմանափակումները, պատվերները մոտեցվում էին մեկ ժամում, հիմա դրանք իրականացվում են երկուսից երեք ժամվա ընթացքում։
Կարծիքներ