Քոչարյանի պաշտպանն ու դատավորի որդին մտերիմներ են. պաշտպանական կողմը ինքնաբացարկ հայտնեց

Երևանի ընդhանուր իրավասության Կենտրոնի նստավայրում ՀՀ երկրորդ նախագահ Ռոբերտ Քոչարյանի գործով դատական նիստը մեկնարկից րոպեներ անց ընդմիջվեց: Այս մասին լրագրողների հետ զրույցում ասաց շահերի պաշտպաններից Արամ Օրբելյանը։ Արդյոք այսօր կվերսկսվի՞, թե՞ ոչ, պաշտպանները դժվարացան ասել, քանի որ հստակ ժամ չի նշվել: Պաշտպանական կողմը ինքնաբացարկի միջնորդություն է ներակայացրել նախագահող դատավոր Արթուր Մկրտչյանին։

Արամ Օրբելյանը նշեց, որ ինքն ու դատավորի որդին մտերմիկ հարաբերություններ ունեն և որպեսզի դատարանի որոշումը շահարկումների առիթ չդառնա, իրենք ինքնաբացարկ են ներկայացրել: Դատախազությունը միջնորդության դեմ առարկել է:

Նշենք, որ օրեր առաջ Քոչարյանին գրավով ազատ արձակելու միջնորդության քննության ժամանակ քննիչը և դատախազը ինքնաբացարկի միջնորդություն էին ներկայացրել նաև դատավոր Նելլի Բաղդասարյանին, և վերջինս միջնորդությունը բավարարել էր: Որից հետո գործը մակագրվել էր մեկ այլ դատավորի՝ Դավիթ Գրիգորյանին։ Վերջինս ինքնաբացարկ էր հայտնել՝ պատճառաբանելով, թե ինքը հերթապահ չի եղել, սակայն գործն իրեն է մակագրվել։ Եթե այս միջնորդությունն էլ բավարարվի, կստացվի, որ երրորդ դատավորն է այս գործով ինքնաբացարկ ներկայացնում: Ռոբերտ Քոչարյանն այսօրվա նիստին ներկա չէր:

Հիշեցնենք, ՀՀ 2-րդ նախագահ Ռոբերտ Քոչարյանը հուլիսի 26-ին Հատուկ քննչական ծառայություն էր ներկայացել «Մարտի 1»-ի գործով վկայի կարգավիճակով՝ հարցաքննության։ Նույն օրը նրան մեղադրանք էր առաջադրվել ՀՀ քրեական օրենսգրքի 300.1-ին հոդվածի 1-ին մասով՝ Սահմանադրական կարգը տապալելը։ Նա հուլիսին կալանավորվեց, ապա օգոստոսի 13-ին ազատ արձակվեց Վերաքննիչ դատարանից։ Ռոբերտ Քոչարյանը, սակայն, ազատության մեջ երկար չմնաց, դեկտեմբերի 7-ին դատարանը՝ նախագահությամբ դատավոր Ռուբիկ Մխիթարյանի, որոշմամբ նա կալանավորվեց: