Ի՞նչ անի տաքսու վարորդը․ գործունեությունը թույլատրված է, բայց գործ չկա

Մենք նամակներ ենք ստանում քաղաքացիներից, որոնք աշխատում են որպես տաքսու վարորդ։ Տաքսիների գործունեությունը պարետի որոշմամբ թույլատրված է, և սա էլ հենց դժվարացնում է նրանց կյանքը, քանի որ արտակարգ ռեժիմի պարագայում, երբ բնակչությունը մեկուսացված կամ ինքնամեկուսացված է, տաքսիները մատնված են անգործության։ Քաղաքացիներից մեկը մեզ ասաց, որ ունի 2 անչափահաս երեխա և չի կարողանում նրանց կերակրել, քանի որ գրեթե գումար չի աշխատում։ Մենք աշխատանքի և սոցիալական հարցերի նախարարությունից փորձեցինք ճշտել՝ արդյոք տաքսու վարորդները հնարավորություն ունե՞ն օգտվելու պետության կողմից նախատեսված սոցիալական աջակցության փաթեթներից։ Սոցապնախարարի մամուլի խոսնակ Սոնա Մարտիրոսյանը մեզ հետ զրույցում ասաց, որ դա կախված է մի քանի հանգամանքից․

«Կախված է նրանից, թե արդյոք երեխաներն անչափահա՞ս են, թե՞ ոչ,  գրանցվա՞ծ աշխատող է որևէ տեղ, թե՞ ոչ։ Եթե նպաստառու է, ապա չի կարող 9-րդ միջոցառման շահառու դառնալ, որովհետև նպաստն արդեն իսկ սոցիալական աջակցության ձև է, բացի այդ՝ դա նշանակում է, որ քաղաքացին թաքցրել է իր եկամուտը՝ նպաստ ստանալու համար»,- պատասխանեց սոցապնախարարության խոսնակը։

Իսկ եթե նպաստառու չէ, ունի անչափահաս 2 երեխա, բայց այս օրերին չի կարողանում գումար աշխատել, ապա այդ քաղաքացին կարո՞ղ է օգնություն ստանալ։

«Այո, դրա համար նախատեսված է 9-րդ միջոցառումը, յուրաքանչյուր երեխայի համար 26 հազար դրամ աջակցություն, բայց դիմել կկարողանան ամսի 15-ից հետո միայն, երբ կարգը հաստատվի»,- պատասխանեց խոսնակը։

Նշենք, որ ըստ 9-րդ միջոցառման ծրագրի՝ միջոցառման շահառու են հանդիսանում բոլոր այն ընտանիքները, որոնք ունեն մինչև 18 տարեկան երեխա, որի երկու ծնողները կամ միայնակ ծնողը չեն ունեցել գրանցված աշխատանք՝ 2020 թ. մարտի 12-ի դրությամբ, և չեն ընդունվել ժամանակավոր կամ մշտական գրանցված աշխատանքի 2020 թ. մարտի 12-31-ն ընկած ժամանակահատվածում: Ծրագրում ընդգրկված ընտանիքը կարող է աջակցություն ստանալ, եթե մինչև 18 տարեկան երեխաները (կամ միակ երեխան) և նրա ծնողները (կամ միայնակ ծնողը) մշտապես բնակվում են Հայաստանում և 2020 թ. մարտի 12-31-ն ընկած ժամանակահատվածում երեխան և ծնողներից առնվազն մեկը գտնվել են Հայաստանում: