«Սասնա ծռերը» նույնպես ոստիկան էին սպանել
Երեկ՝ ծառայողական պարտքը կատարելիս, սպանվեց 38-ամյա ոստիկան Տիգրան Առաքելյանը, եւս մեկ ոստիկան վիրավորվել է։ Ոստիկանության պետի պաշտոնակատար Արման Սարգսյանը հայտարարեց, որ ոստիկանի վրա ձեռք բարձրացնել՝ նշանակում է ձեռք բարձրացնել պետության վրա, եւ նման բան անողները խստագույնս կպատժվեն։ «Ես կցանկանամ մի հանգամանքի մասին խոսել, կուզեմ, որ հանրային ընկալման մեջ բոլորը գիտակցեն՝ ոստիկանի վրա ձեռք բարձրացնելը հավասարազոր է պետության վրա ձեռք բարձրացնելուն, եւ խստագույնս պատժվելու են նրանք, ովքեր այսկերպ կամ որեւէ կերպ կհանդգնեն պետության վրա ձեռք բարձրացնել»,- ասաց Սարգսյանը։ Զոհված ոստիկանի հարազատներին ցավակցեց նաեւ վարչապետ Նիկոլ Փաշինյանը՝ իր ֆեյսբուքյան էջում գրելով․ «Հայաստանում ոստիկանների պաշտպանվածությունը պետք է բարձրանա այնպես, որ դա ոչ միայն ու ոչ այնքան ոստիկանների, որքան քաղաքացիների պաշտպանվածության մակարդակը բարձրացնի: Տիգրան Առաքելյանը կարժանանա պետական պարգեւի՝ անձնուրաց ծառայության համար, իսկ հանցագործները կստանան իրենց արժանի պատիժը»։
Շատերն անմիջապես հիշեցին 2016 թվականին «Սասնա ծռեր» խմբավորման գործողությունների հետեւանքով ՊՊԾ գնդում զոհված ոստիկաններին։ Ոմանք էլ ժամանակին տարակուսեցին, երբ Փաշինյանի՝ վարչապետ նշանակվելուց հետո մեկը մյուսի ետեւից կալանքից ազատվեցին ՊՊԾ գնդի գրավման օպերացիայի մասնակիցները, իսկ վերջերս էլ նրանց կուսակցության առաջնորդներին կառավարությունում ընդունեց Նիկոլ Փաշինյանը։
«Ես կարծում եմ, որ ոստիկանապետի պաշտոնակատարը շատ ճիշտ է ասում, որ ոստիկանի վրա ձեռք բարձրացնելը պետության վրա ձեռք բարձրացնել է։ Դա ամբողջ աշխարհում է ընդունված, ամբողջ աշխարհում ոստիկանները պաշտպանված են պետության կողմից, երբ կատարում են իրենց ծառայողական պարտականությունները։ Ինչ վերաբերում է «Սասնա ծռերին», ապա ես իմ կարծիքն ունեմ, բայց իմ կարծիքը ոչ մեկին չի հետաքրքրում, դրա համար չեմ պատասխանում։ Ես շատ շնորհակալ եմ, որ իմ կարծիքը Ձեզ հետաքրքրում է, բայց բոլորին էլ պարզ է, որ «Սասնա ծռերը» միանշանակ հանցագործություն են կատարել, ոստիկաններ են սպանվել, եւ ես շատ ուզում եմ, որ մեղավորները դատապարտվեն»,- մեր դիտարկմանն ի պատասխան՝ ասաց ոստիկանության գեներալ-լեյտենանտ, ոստիկանության կրթահամալիրի նախկին պետ Հովհաննես Վարյանը։
Նախկին փոխոստիկանապետ Սամվել Հովհաննիսյանը նույնիսկ թույլ չտվեց հարցն ավարտել՝ միանգամից ասելով, թե չի ցանկանում «Սասնա ծռերի» մասին խոսել․ «Ես խնդրում եմ՝ «Սասնա ծռերից» ինձ հարցեր մի տվեք, որովհետեւ նրանք ինձ համար տեռորիստներ են, ես՝ ինքս, 2016 թվականին, որպես ոստիկանության պետի տեղակալ, 14 օր կազմակերպել եմ արտաքին ծառայությունը, ես չեմ կարող խոսել մի կազմակերպության կամ մարդկանց մասին, որոնք իմ ընկերների, իմ արյունն են տարել, ես ինչպե՞ս կարող եմ հիմա իրենց մասին խոսել, ես տեռորիստների մասին չեմ խոսում, որովհետեւ իրենք ինձ համար անցած են»։
Կարծիքներ