Ի՞նչ է ասել Փաշինյանը ՆԱՏՕ-ի գլխավոր քարտուղարին

ՆԱՏՕ-ի գլխավոր քարտուղար Յենս Ստոլտենբերգին եմ ներկայացրել Հարավային Կովկասում կայունություն եւ խաղաղություն հաստատելու Հայաստանի կառավարության տռեսլականն ու մոտեցումները:  Այս մասին քիչ առաջ ՆԱՏՕ-ի գլխավոր քարտուղար Յենս Ստոլտենբերգի հետ համատեղ մամուլի ասուլիսին ասաց վարչապետ Նիկոլ Փաշինյանը:

«Վերահաստատում եմ բազմիցս հնչեցրած պատրաստակամությունը կարգավորելու Ադրբեջանի հետ հարաբերությունները բարձրագույն մակարդակում համաձայնեցված երեք սկզբունքների հիման վրա: Այն է՝ միմյանց տարածքային ամբողջականության ճնաչում Ալմա-Աթայի հռչակագրի հիման վրա, համաձայն Ալմա-Աթայի հռչակագրի Հայաստան-Ադրբեջան միջպետական սահմանի սահմանազատում վերականգնելու համար 1991 թվականի ԽՍՀՄ փլուզման պահին գոյություն ունեցած սահմանը երկու հանրապետությունների միջեւ, ինչպես նաեւ տարածաշրջանային ենթակառուցվածքների ապաշրջափակումը՝ դրանց անցման երկրների ինքնիշխանության եւ իրավազորության հարգմամբ, հավասարության եւ փոխադարձության սկզբունքների հիման վրա: Վերջինիս առնչությամբ ներկայացրել եմ նաեւ թեմայի վերաբերյալ մեր պատկերացումներն ամբողջացնող «խաղաղության խաչմերուկ» նախագիծը: Ակնկալում ենք միջազգային հանրության, այդ թվում ՆԱՏՕ-ի հաստատակամ աջակցությունը Հայաստանի եւ Ադրբեջանի միջեւ խաղաղության գործընթացին հայտնի եւ երկուստեք համաձայնեցված սկզբունքների հիման վրա, ինչպես նաեւ հարկադրանքի եւ սպառնալիքի քաղաքականության միանշնակ մերժումը:

Գլխավոր քարտուղարին ներկայացրել եմ նաեւ 1991 թվականի Հայաստան-Ադրբեջան սահմանագծից զորքերի հայելային հետքաշման, սպառազինությունների փոխադարձ վերահսկման, չհարձակման պայմանագրի ստորագրման առաջարկները, որոնք դրական արձագանք չեն ստացել պաշտոնական Բաքվից մինչեւ օրս»,- ասաց նա: