Ինչո՞ւ կառավարությունը սոցիալական աշխատատեղեր չի ստեղծում

Մեր խմբագրություն էր զանգահարել Ռազմիկ անունով մի գործարար, որն առաջարկություն ունի կառավարությանը սոցիալական խնդիրների հաղթահարման վերաբերյալ։ Ու խնդրեց հանրայնացնել իր առաջարկը՝ գուցե կառավարության «խելքին նստի» և մի օգուտ տան ժողովրդին։

«Գործարարն առաջարկում է պետական մակարդակով սոցիալական աշխատատեղեր ստեղծել, որ ճգնաժամային այս իրավիճակում մարդիկ անգործ չմնան, գնան տարբեր հասարակական բնույթի աշխատանքներ իրականացնեն իրենց համայնքներում։ Օրինակ՝ քաղաքապետարանը սանմաքրման կամ ծառատնկման աշխատանքներ է իրականացնում, որոնց համար աշխատուժ է հարկավոր, մեկ այլ տեղ մեկ այլ աշխատանքի կարիք կա, որոնց համար գուցե մարդկային ռեսուրսի խնդիր է առաջանում, ուստի կառավարությունը կարող է գումար հատկացնել, որ աշխատանք չունեցողները դիմեն և ժամանակավոր վարձու աշխատանք կատարեն։

«Թող ստեղծեն սոցիալական աշխատատեղեր։ Օրինակ՝ օրը 5000 դրամի չափով, ովքեր կարիքավոր են, թող գնան կատարեն այդ աշխատանքը և վարձատրվեն, օրինակ՝ ծառատունկ, օրինակ ճանապարհի մաքրում, միայնակ ծերերի խնամք և այլն։ Թող կայքում տեղադրվի այդ անձանց ցուցակը, և տվյալ համայնքի ղեկավարները, որ նման աշխատանքի կարիք կունենան, այդ ցուցակով աշխատող գտնեն, կամ էլ մարդիկ իրենք դիմեն իրենց համայնքապետարան, որ ընդգրկվեն աշխատանքի։ Բայց մի պայմանով՝ յուրաքանչյուրը կարող է մեկ ամսվա ընթացքում 10 օր աշխատի, ոչ՝ ավել, որ մյուսներին է հասնի»,-ասաց մեր զրուցակիցը։

Նա հաշվարկ կատարել էր, և կարծում է, որ բյուջեում ամսական 500 մլն դրամից մինչև 1 մլրդ դրամ նախատեսելու դեպքում հնարավոր է դա իրականացնել։ «Եթե ամսական 500 մլն դրամ հատկացնեն, 10 հազար սոցիալական աշխատատեղ կստեղծվի, ինչու՞ չեն անում»,-ասաց գործարարը։

Ընդ որում, դա կարելի է անել ոչ միայն կորոնավիրոսային այս շրջանում, այլ տարին կլոր, քանի որ կարիքավոր ընտանիքները միայն կորոնավիրոսի օրերին չեն, միշտ էլ կգտնվեն մարդիկ, որոնք այդ աշխատանքի կարիքը կունենան։