Հայոց պատմության նոր դասագրքում անհրաժեշտ լրամշակումներ կարվեն

ԿԳՄՍ նախարար Ժաննա Անդրեասյանը, օրերս անդրադառնալով պատմաբան Սմբատ Հովհաննիսյանի հեղինակած 7-րդ դասարանի Հայոց պատմության դասագրքին, վստահեցրել է, որ կարվեն թե՛ տեխնիկական, թե՛ բովանդակային անհրաժեշտ լրամշակումներ. «Դրանք ամբողջությամբ երկրորդ կիսամյակում հասանելի կլինեն էլեկտրոնային տարբերակով: 

Ինչ վերաբերում է թղթային տարբերակին, այս պահին կգնանք ներդիրների ճանապարհով՝ նկատված վրիպակներն ու խնդիրներն ուղղելու համար, այնուհետեւ արդեն վերահրատարակության խնդիրը կքննարկենք: Ինչ վերաբերում է մասնագիտական կարծիքներին, մենք շատ ուշադիր ենք այդ դիտարկումների նկատմամբ: Հանդիպում կլինի մասնագիտական շրջանակի այն ներկայացուցիչների հետ, որոնք հանրային ու ոչ հանրային ձեւով արտահայտել են իրենց դիտարկումները»:

Հիշեցնենք, որ օրեր առաջ «Բնօրրան պատմական հուշարձանների պահպանման հայկական ընկերություն» ՀԿ-ն, դասագրքի հետ կապված, 19 գիտնական պատմաբանների կողմից կազմված երկար մասնագիտական եզրակացություն էր հրապարակել, որոնք պահանջել էին կասեցնել դասագրքի կիրառումը դպրոցներում։

Ինչ վերաբերում է հեղինակային խմբին, ապա դասագրքի մրցույթում հաղթող ճանաչված «Մասնակցային դպրոց» կրթական հիմնադրամի տնօրեն Վահրամ Սողոմոնյանն էլ նշել էր, որ իրենց կողմից դասագրքում արձանագրվել է մոտ 30 վրիպակ, որոնք տարբեր բնույթի են եւ ունեն շտկման կարիք: Նրա խոսքով՝ այս առումով հաշվի են առնվելու թե՛ ծանրակշիռ գիտական փաստարկ պարունակող դիտարկումները, թե՛ բովանդակային հարցերը, թե՛ ժամանակագրության հետ կապված վրիպակները, թե՛ պատկերային նյութերը՝ կապված, մասնավորապես, Ուրարտուի քարտեզի եւ որոշ այլ նյութերի հետ: Նա նաեւ նշել է, որ հիմնադրամի կողմից հրատարակված մյուս դասագրքերի վերաբերյալ իրենք հիմնականում ստացել են դրական արձագանքներ, իսկ «Հայոց պատմություն 7» դասագրքի առանձին թեմաների դասավանդման կազմակերպման առումով ուսուցիչները գոհ են։