Թատրոն էին բերվել շպիոններ, որոնք իմ ամեն խոսքը հասցնում էին համայնքի ղեկավարին

Ավելի վաղ «Հրապարակը» գրել էր, որ Ալավերդու քաղաքային թատրոնում կոլեկտիվի և տնօրինության միջև հակասություններ են հասունացել, ինչի արդյունքում թատրոնից չորս դերասան և գեղարվեստական ղեկավար Հրաչյա Պապինյանը հեռացել են: Մեզ դիմել էր թատրոնի դերասանուհի Սիլվա Նազարյանը, ով պատմել էր, որ Աշխատանքային օրենսգրքի կոպիտ խախտումով իրեն թատրոն են կանչել շաբաթ և կիրակի օրերին, ապա ասել էին, որ պետք է դերասաններն աշխատանքի ներկայանան առավոտյան ժամը 9-ից երեկոյան ժամը 6-ը: Նազարյանը մեզ հետ զրույցում նաև նշել էր, որ այդ կանխակալ վերաբերմունքը պայմանավորված էր Հրաչյա Պապինյանի անձով: Ալավերդու համայնքային իշխանություններն ամեն կերպ փորձում են ազատվել  թատրոնի հնաբնակներից, որոնք այս կամ այն կերպ առնչվել են Հրաչյա Պապինյանի հետ:

Սիլվա Նազարյանը մեզ հետ զրույցում նաև պնդել է, որ Ալավերդու փոխքաղաքապետ Տիգրան Պապոյանն ալկոհոլի ազդեցության տակ ծխել և փչել է իր դեմքին, ապա նշել, որ չի ցանկանում իրեն տեսնել թատրոնում: Պապոյանը, սակայն, մեզ հետ զրույցում հերքել էր Նազարյանի այդ հայտարարությունը, ասելով, որ նման բան տեղի չի ունեցել: Ի վերջո ի՞նչ է տեղի ունեցել Ալավերդու քաղաքային թատրոնում, ինչի՞ արդյունքում է թատրոնը հայտնվել նման իրավիճակում, այս և այլ հարցերի մասին «Հրապարակը» զրուցել է թատրոնի նախկին գեղարվեստական ղեկավար, լրագրող Հրաչյա Պապինյանի հետ:

- Պարոն Պապինյան, ի՞նչ է տեղի ունեցել Ալավերդու թատրոնում: Ինչի՞ արդյունքում են այդ խժդժությունները հասունացել: Պատճառը ո՞րն է:

- Ուզում եմ ամենասկզբից նշել, որ ես քաղաքական գործիչ չեմ և չեմ կարող քաղաքական հակասություններ ունենալ ինչ-որ մեկի հետ: Ոչ մյուս կողմն է քաղաքական ուժ, ոչ էլ ես: Պարզապես խնդիրն այն է, որ ես տեղական լրատվամիջոցի ղեկավար եմ` «Անկյուն + 3» հեռուստաընկերության մասին է խոսքը, և կարծում եմ` խնդիրները հենց այդտեղից են գալիս: Հավանաբար մեր հրապարակումներն ինչ-որ մարդկանց դուր չեն գալիս: Այնպես չէ, որ ինձ հրամանով ազատել են աշխատանքից, պարզապես թատրոնում ստեղծվել էր մի իրավիճակ, որ արդեն այնտեղ մնալն անհնար էր: Թատրոն էին բերվել շպիոններ, որոնք իմ ամեն մի խոսքը հասցնում էին համայնքի ղեկավարին: Համայնքի ղեկավարն էլ իր մոտ գրառումներ էր անում, հետո տարբեր մարդկանց ցույց տալիս, թե տեսեք` Հրաչյա Պապինյանն այս տեսակ բաներ է ասում: Մի խոսքով` Ալավերդու թատրոնում մթնոլորտն ահավոր էր, դրա համար էլ հեռացա: Ալավերդու համայնքի ղեկավարը համայնքի խնդիրները թողած զբաղված է ինֆորմացիաներ հավաքելով: Նման մթնոլորտում ես չէի կարող աշխատել այնտեղ: Կային մարդիկ, որոնք ինձ հետ երկար ճանապարհ էին անցել, սակայն խոսքերիցս մեկը տասը դարձնելով հասցնում էին համայնքի ղեկավարին:

- Իսկ մյուս դերասանների հետ ի՞նչ խնդիր է առաջացել: Ինչո՞ւ են դերասաններին պարտադրում շաբաթ-կիրակի օրերին գնալ աշխատանքի, առավոտյան 9:00-ից 18։00-ը նստել թատրոնում:

- Իմ ժամանակ էլ նախորդ համայնքի ղեկավարը փորձեց նման մի բան անել, ես ասացի, որ այդ պայմաններում առաջին հերթին ես չեմ աշխատի: Հայաստանի Հանրապետությունում աշխատանքային հարաբերությունները կատարում է Աշխատանքային օրենսգիրքը: Պետք է թատրոնի դերասանի աշխատանքը ճիշտ բաշխել: Թատրոնի դերասանն ունենում է նաև տնային աշխատանքներ, այսպես ասած, և բոլորովին պարտադիր չէ, որ ամեն օր դերասանը հաճախի թատրոն:

- Վերջերս Նիկոլ Փաշինյանը եկել էր Լոռու մարզ: Վարչապետին ջերմ ընդունելության արժանացրին լոռեցիները: Իշխանություններին իսկապապե՞ս համակրում են Լոռու մարզում: Մարդկանց կյանքում այդտեղ ի՞նչ է փոխվել:

- Ցավոք, իմ քաղաքական դիրքորոշման պատճառով ես Հանրային հեռուստաընկերությունից վտարվել եմ: Լոռեցիները լավ չեն ապրում: Այնպես չէ, որ առաջ վատ էին ապրում, այսօր լավ են ապրում, կամ հակառակը: Ձեր կարծիքով՝ թույլ կտայի՞ն Լոռու ընդդիմադիր մասսային մոտենալ վարչապետին, կողմնակիցներին էին բերել, նրանք էլ լավ պետք է ընդունեին.... բոլոր տեղերում էլ Նիկոլ Փաշինյանը կողմնակիցներ ունի: Մի խոսքով` հավաքել էին Փաշինյանի կողմնակիցներին: Ցավալին այն է, որ մարդկանց մի տեսակ կա, որոնց համար կապ չունի՝ իշխանությունն ով է: Եթե իշխանություն լիներ Քոչարյանը` նույն բանը նրա համար էին անելու: