Լիճքի արագաչափը` «թակարդ» վարորդների համար
2014 թվականին Գեղարքունիքի մարզի Լիճք համայնքի վարչական տարածքում տեղադրվեց արագաչափ: Ճանապարհը, որտեղ տեղադրված է արագաչափը համայնքը բաժանում է երկու մասի: Որպես բնակավայր երթեւեկության համար թույլատրելի առավելագույն արագությունը 60 կմ/ժ է: Վերջերս Վարդենիս այցելության ժամանակ նկատեցինք, որ բացակայնում են տեղադրված արագաչափի մասին նախազգուշացնող երկկողմանի եւ երթեւեկության համար թույլատրելի առավելագույն արագությունը 60 կմ/ժ նշանները:
Գյուղացիներից հարցուփորձ արեցինք, արդյո՞ք արագաչափը տեղադրելուց հետո որեւէ նախազգուշացնող նշան չի տեղադրվել. «Որ արագաչափը նոր էին տեղադրել նշանները կար, ահագին ժամանակ է չկա, գողանում են: Մենք արդեն գիտենք, զգույշ ենք քշում, բայց դրսից գալացողները մեկը՝ մյուսի հետեւից նկարվում ա: Շատ խորամանկ քայլ են արել, արագաչափը դրել են մի տեղ, որ եթե Երեւանից Մարտունի են գնում ճանապարհը դեպի վեր ա բարձրանում, վարորդները ստիպված արագությունը մեծացնում են, ու չիմանալով, որ նկարահանող սարք կա, ընկնում են «թակարդը»,-ասում էին գյուղացիները: Լիճք գյուղի բնակիչ Վանո Կարապետյանը մեզ հետ զրույցում ասաց, որ համայնքում միջպետական ճանապարհին ոչ մի նշան չկա տեղադրված, անգամ չալարեց, անձամբ մոտ 1 կմ ոտքով քայլելով անցավ ու նկարահանեց ողջ տարածքը: Ըստ գյուղացիների՝ տեղադրված արագաչափից ներքեւ ճանապարհատրանսպորտային պատահարների պակաս չի լինում: Գյուղացիները անգամ խնդրել են մարզի ՃՈ բաժնին տեսանկարահանող սարքը տվյալ մասում տեղադրել, որպեսզի վթարները քչանան, սակայն մերժում են ստացել:
Տեղադրված արագաչափից վերեւ միակ ճանապարհային նշանը, որ նկատեցինք, դա խոշոր եղջերավոր կենդանիների նախազգուշանող նշան էր, իսկ թե այս նշանն ինչո՞ւ չեն գողանում, գյուղացիները ուսերը թոթափելով ասացին. «Ի՞նչ իմանանք»:
Լիճք համայնքի ղեկավար Գնել Գրիգորյանը մեզ հետ զրույցում ասաց, որ արագաչափը նախազգուշացնող նշաններ եղել են տեղադրված:
-Պարո՛ն Գրիգորյան, երբվանի՞ց են այդ նախազգուշացնող նշանները բացակայում:
-Ուշադիր չեմ եղել, չեմ կարող պատասխանել: Ես անձամբ գիտեմ, զգույշ եմ քշում, ինձ թվում ա բոլորն էլ տեղյակ կլինեն արագաչափի մասին:
-Նշանները, գողացե՞լ են, տեղյակ եք, թե ի՞նչ են եղել:
-Մի գուցե, չեմ կարող ասել, որովհետեւ համայնքում էլ նշաններ կային տեղադրված, մեկ էլ տեսնում եմ այդ նշանները չկան: Ինչ-որ վիժվածքներ գողացան, չգիտեմ ինչ արեցին: Համայնքի ներսում ես ուշադիր եմ այդ հարցում, բայց համայնքից դուրս իմ պարտականությունների մեջ չի մտնում:
-Բայց համայնքի վարչական տարածքում է տեղադրված արագաչափը: Որպես համայնքի ղեկավար հանդիպում չեք ունեցե՞լ համապատասխան բաժինների հետ հարց բարձրացնելով՝ տեղադրել նախազգուշացնող նշանները:
- Այո՛, համայնքի վարչական տարածքում է տեղադրված, բայց այդ ճանապարհը միջպետական ճանապարհ է, դա իմ իրավասությունների մեջ չի մտնում, որ ես ասեմ, ստեղ նշան դրեք, կամ մի դրեք:
-Փաստորեն համայնքի բնակիչները ծանոթ են տարածքին, իսկ այլ մարզերից ու քաղաքաների բնակիչները այդ ճանապարհով անցնելիս տեսախցիկի «թակարդն» են ընկնում:
-Կարելի է ասել մարզի կտրվածքով որոշակի տեղեկություն ունեն, իսկ քաղաքից մեկը որ գալիս ա գնում Մարտունի կամ Վարդենիս բնականաբար չգիտի: Ես ոչինչ չեմ կարող ասել, դա իմ իրավասությանների մեջ չի մտնում: Դա արդեն ՃՈ-ի վարչության կամ էդ խցիկն տեղադրող ընկերության խնդիրն ա:
Կարծիքներ