Սերժ Սարգսյանը հաղթե՞ց, թե՞ նվաստացավ

Կոալիցիոն նոր հուշագրի ստորագրումից հետո քաղաքական ուժերը կարծես ընդհատակ են անցել՝ բոլորը խուսափում են լրագրողների հետ շփվել եւ տեսակետներ հայտնել ՀՀԿ-ԲՀԿ նոր կոալիցիոն հուշագրի վերաբերյալ:



Փոխարենը՝ երեկ իրենց վրա այդ պարտականությունն էին վերցրել «Հայելի» ակումբի հյուրեր՝ գրող-հրապարակախոսներ Տիգրան Պասկեւիչյանը եւ Արծրուն Պեպանյանը: Բանախոսների կարծիքով՝ մեր երկիրն այսօր «տխուր» վիճակում է. Մերձավոր Արեւելքում տիրող իրավիճակը շղթայական ռեակցիայով տարածվում է եւ կարող է հասնել Հայաստան, հետեւաբար՝ իշխանությունները փորձեցին դիրքային հարցեր ճշտել:



«Մի բան, որ երբեւէ չէր եղել Հայաստանում կամ եթե եղել էր, չէր դարձել հանրային քննարկման առարկա: Դա արհեստածին լինել չէր կարող, որովհետեւ որեւէ մարդ, որ զբաղեցնում է նախագահի պաշտոնը, որն առաջին դեմքն է, չէր ցանկանա էդ աստիճան նվաստանար՝ ինչ-որ բաներ հասարակությանն ապացուցելու կամ ցույց տալու համար: Անգամ այն բանից հետո, երբ Ծառուկյանն ստորագրեց Սերժ Սարգսյանի անունը պարունակող ներկոալիցիոն հուշագիրը, կարծում եմ՝ ՀՀ նախագահի պաշտոնը զբաղեցրած մարդը նվաստացած վիճակում է»,-սա Տիգրան Պասկեւիչյանի բնորոշումն է, ում կարծիքով՝ եթե իրենք կոալիցիա են,  քաղաքական թիմ, նման հարց չպետք է առաջանար:



«Իրականում ստեղծվեց այսպիսի իրավիճակ, ճիշտ է՝ ամեն ինչ լավ չի, ճիշտ է՝ ամեն ինչ էնպես չի, ճիշտ է՝ դու լավ նախագահ չես, բայց մենք ստիպված ենք ստորագրել ներկոալիցիոն հուշագիրը»:



Արծրուն Պեպանյանն էլ հայկական կուսակցությունները նմանեցրեց բիզնես ակումբների: «Կցանկանայի, որ «Բարգավաճի» եւ Հանրապետականի միասնություն չլիներ, տարաձայնություններ ունենային: Երբ 2007-ին ստեղծվեց ԲՀԿ-ն՝ հենց հակակշիռ ապահովելու նպատակ ունեին: Իշխանության մեջ իշխող երկու մարդիկ խնդիրներ ունեին իրար մեջ, եւ երկու բեւեռ էր պետք:



Սակայն այն ժամանակ Սերժ Սարգսյանը հաղթեց, իրեն միավորեց: Հիմա հաշիվը դարձավ 2:0: Սերժ Սարգսյանը շահեց, բայց ազգը կորցրեց եւս մի հնարավորություն: Ավելի դյուրին կլինեին խաղի կանոնները, եթե լիներ իշխանական երկու բեւեռ եւ երրորդ բեւեռը՝ ընդդիմություն»: Իսկ հնարավո՞ր է, որ այս գործընթացը լինի շարունակական, եւ Սերժ Սարգսյանն իր ձեռքում հավաքի բոլոր օլիգարխներին: Պեպանյանն այսպես պատասխանեց. «Նա, ով օլիգարխների հարցը լուծում է... ինչի՞ն է պետք հավաքել բոլոր օլիգարխներին, եթե ունի միլիարդներ: Ինչի՞ն է պետք ողջ Հայաստանը: Վերացնի բոլոր օլիգարխներին, որ բոլոր սուպերմարկետները լինեն նրա՞նը: Ինչի՞ն է դա պետք»:



«Ամեն ինչ այդքան էլ հեշտ չէ, քանի որ էն մարդը, որ ունի իշխանական լծակներ, ունի նաեւ որոշակի պարտավորություններ էն մարդկանց հանդեպ, ում մենք կոչում ենք օլիգարխներ»,-համոզմունք հայտնեց Պասկեւիչյանը: