Մաքսիմ Հակոբյանը կուրախանա, որ ես վերընտրվեմ

Անդրադառնալով սեպտեմբերին կայանալիք ՏԻՄ ընտրություններին՝ մենք արդեն տեղեկացրել ենք, որ դրանք բուռն են անցնելու ու հատկապես որոշ մարզերի որոշ համայնքներում: Այդ թվում Սյունիքի մարզկենտրոն Կապան քաղաքում: Նշել էինք, որ մարզպետ Սուրեն Խաչատրյանը մտադիր է մարզն ամբողջությամբ ՀՀԿ-ացնել, ինչի մասին ակնարկում է նաեւ Կապանի քաղաքապետը: Կապանում ՀՀ միակ ՀՅԴ-ական քաղաքապետ Արտուր Աթայանի հետ պայքարի դուրս կգա ՀՀԿ-ական Աշոտ Հայրապետյանը, ով ներկայում ղեկավարում է «Հայփոստի» մարզային կառույցը: Օրեր առաջ զրուցել էինք Աշոտ Հայրապետյանի հետ, իսկ երեկ լսեցինք գործող քաղաքապետ՝ Արտուր Աթայանին, ով երկրորդ անգամ առաջադրվելու որոշում է կայացրել: «Ես վատ չեմ աշխատել եւ որեւէ խնդիր չեմ տեսնում չառաջադրվելու»:



- Սիսիանի քաղաքապետն ասում էր, որ լավ է աշխատել, Դուք վախենո՞ւմ եք նման բան ասել:



- Ես այդպես չեմ կարող ասել, դա մենակ ժողովուրդը կարող է ասել: Ես վատ չեմ աշխատել:



- Կարծում եք աշխատա՞նքն է ընտրվելու առաջին գրավականը, որովհետեւ  Ձեր մրցակիցը մարզպետի եւ մարզում ազդեցիկ Մաքսիմ Հակոբյանի հովանավորյալն է:



- Ես կարծում եմ, որ մեզ մոտ դա չի անցնելու, ժողովուրդը կընտրի նրան, ում հավատում է:



- Ասում են՝ մարզպետը մտադիր է ՀՀԿ-ացնել մարզը,  մտավախություններ չկա՞ն:



- Ես անցած 4 տարիները գնահատելով՝ կարծում եմ, որ Սյունիքի մարզը եղել է օրինակելի ՀՀ-ի համար, նկատի ունեմ՝ կա եւ ՀՀԿ-ական մարզպետ, եւ դաշնակցական կամ «Բարգավաճ» քաղաքապետեր: Մենք մարզում իրար հետ ընդհանուր առմամբ վատ չենք աշխատել, եւ նորմալ հարաբերություններ են եղել բոլորիս հետ: Բոլոր խնդիրները, որոնք դրվել են, մենք նորմալ կատարել ենք: Կարող եմ ասել, որ կուսակցականությունն այս 4 տարիների ընթացքում երեւաց միայն խորհրդարանական ընտրությունների ժամանակ: Եվ հիմա աբսուրդ եմ համարում, որ իշխող կուսակցությունը պետք է խառնվի ՏԻՄ ընտրություններին:



Ի վերջո պետք է ընտրվի կոնկրետ մարդը, որին ժողովուրդն ընդունում է եւ չի կարեւորում նրա կուսակցական պատկանելությունը: Եվ այդ 4 տարիներին մենք լավ ենք աշխատել, ինձ համար խնդիր չի եղել՝ մարզպետը ՀՀԿ-ական է, թե ոչ, ես աշխատել եմ ի նպաստ ժողովրդի: Թե հիմա ինչու են նման խնդիր դրել (նկատի ունի մարզը ՀՀԿ-ացնելը՝ Լ. Շ.), դժվարանում եմ ասել: ՀՀԿ-ականների ժողով եղավ, եւ որոշում կայացրին, որ բոլոր ընտրատարածքներում ՀՀԿ-ական թեկնածուներ պետք է լինեն: Ես զարմանում եմ. եթե ՀՀԿ-ն Կապանում նման բան է անում, ապա գոնե պիտի քաղաքական գնահատական տրվի անցած 4 տարվա գործունեությանը, ու ասի, թե ինչը նկատի ունենալով է առաջադրում իր թեկնածուին: Ի դեպ, ես չեմ կարծում, որ սա ընդհանուր քաղաքական խնդիր է, դա, իմ կարծիքով, ինչ-որ մարդկանց քմահաճույքի արդյունք է:



- Ուզում եք ասել, որ Մաքսիմ Հակոբյանի քմահաճույքի՞ խնդիրն է, որովհետեւ թե Սիսիանում, թե Կապանում ՀՀԿ թեկնածուները,  ասում են, Հակոբյանի մտերիմներն են:



- Չէ, ես նման բան չեմ կարող ասել, թե Մաքսիմի հետ են կապված, ընդհակառակը, դա ավելի շատ մարզպետի հետ է կապված: Բայց դեռ հարց է՝ կկարողանա՞ն ամբողջությամբ ՀՀԿ-ացնել մարզը, թե՞ ոչ: Գուցե մարտավարություն է, որ իրենց կուսակցությունը բոլոր տեղերում թեկնածուներ պետք է ունենա: Թե չէ՝ ուրիշ տարբերակ չեմ կարող պատկերացնել: Հենց վեց ամիս առաջ մարզպետի կողմից կառավարական պարգեւի եմ արժանացել: Մենք մարզպետի հետ վատ չենք համագործակցել: Շատ նորմալ ծրագրեր ենք համատեղ իրականացրել, եւ այս 4 տարվա ընթացքում ես միայն լավն եմ լսել նրա կողմից: Եվ այդ միտումն ինձ համար անհասկանալի է:



- Քանի որ Սյունյաց մարզպետը բավականին հայտնի համբավ ունի, հնարավո՞ր է ճնշումներ գործադրի Ձեր նկատմամբ, եւ Դուք հրաժարվեք առաջադրվելու ցանկությունից, որոշումից:



- Հաստատ նման բան չի լինի: Համոզված եմ, որ ամեն ինչ նորմալ է լինելու:



- Լավ, հիմա Մաքսիմ Հակոբյանի ազդեցությո՞ւնն է մարզում մեծ, թե՞ Սուրեն Խաչատրյանի:



- Առաջին ընտրությունների ժամանակ պարոն Հակոբյանն ինձ բավականին լուրջ օժանդակել է, եւ ես իր օգնությամբ եմ առաջադրվել եւ ընտրվել Կապանի քաղաքապետ: Եվ ես Հակոբյանին եմ բավականին լուրջ դերակատարում ունեցող անձ համարում, շատ լուրջ: Նույնն էլ մարզպետը, գիտեք, մենք հզոր մարզպետ ունենք:



- Հնարավո՞ր է այս անգամ էլ պարոն Հակոբյանը Ձեզ աջակցի:



- Ես դա չեմ կարող ասել, բայց, կարծում եմ, ինքը մի անգամ ինձ հնարավորություն տվել է, օգնել է, ես ընտրվել եմ քաղաքապետ: Եվ հիմա, եթե ես լավ չեմ աշխատել եւ չկարողանամ իմ ունեցած  արդյունքով նորից վերընտրվել, կարծում եմ՝ ինձ որեւէ մեկը չի կարող օգնել: Ես վստահ եմ, որ հիմա իմ ուժերով եւ իմ արած աշխատանքով կարող եմ ընտրվել: Մի բանում համոզված եմ, որ եթե ես ընտրվեմ, ինքը հաստատ կուրախանա:



- Ձեր մրցակիցը ձեռնպահ մնաց գնահատել Ձեր գործունեությունը, Դուք ե՞ւս կհրաժարվեք Աշոտ Հայրապետյանի մասին խոսք հայտնելուց:



- Գիտեմ, որ բավականին լավ ընտանիքի զավակ է, լավ ծնողներ եւ եղբայրներ ունի, ինքն էլ նորմալ բնութագրում ունի, բավականին ինտելիգենտ անձնավորություն է: Ես միայն դրական եմ գնահատում եւ կարծում եմ, որ երկուսիս համար էլ դժվար պայքար է սպասվում: